पुणे – पेरिविंकल इंग्लिश मिडिअम स्कूल व ज्यु. कॉलेजच्या सूस, बावधन, पिरंगुट, पौड, कोळवण व माले या सर्व शाखांमध्ये आगळा वेगळा पालखी सोहळा संपन्न झाला. ‘जय राम कृष्ण हरी’, विठुचा गजर हरी नामाचा झेंडा रोवीला,विठ्ठल विठ्ठल जय हरी विठ्ठल..अशा जयघोषाने संपूर्ण शाळा या चिमुकल्यांच्या गजराने दुमदुमली होती.

पेरिविंकल शाळेच्या सूस येथील शाखेमध्ये आषाढी एकादशीचा पालखी सोहळा अतिशय उत्साहात आणि चैतन्यमय व भक्तिमय वातावरणामध्ये साजरा करण्यात आला.

या कार्यक्रमात पालखीचे प्रस्थान व पालखी पूजन हे शाळेचे संस्थापक राजेंद्र बांदल,संचालिका सौ. रेखा बांदल,शाळेच्या मुख्याध्यापिका सौ निर्मल पंडित यांच्या हस्ते करण्यात आले. या कार्यक्रमाच्या सुरुवात दीपप्रज्वलन झाली. यानंतर विठ्ठलाची आरती करून संपूर्ण परिसर हरिनामाच्या गजराने दुमदुमाल्याचे पाहायला मिळाले.

महाराष्ट्रातील संतांच्या हृदयात स्थान असणारे अवघ्या महाराष्ट्राचे दैवत म्हणजे ‘पंढरपूरचा विठोबा’ या पालखीचे वैशिष्ट्य म्हणजे ही फक्त पालखी नसून ही विद्यार्थ्यांनी शैक्षणिक दिंडी म्हणून सादर केली. या दिंडीमध्ये संत नामदेव, तुकाराम , ज्ञानेश्वर अशा विविध वेशभूषा परिधान करून विद्यार्थ्यांनी अभंग सादर केले.

विद्यार्थ्यांनी पालखीचे आकर्षण वाढविणारा ‘रिंगण सोहळा’ सादर केला.तसेच विविध कार्यक्रम, नृत्य व पालखीचे दिमाखात आगमन व प्रस्थान विद्यार्थ्यांनी अत्यंत शिस्तबद्ध पद्धतीने सादर केले. या कार्यक्रमाचे आयोजन शाळेचे संस्थापक अध्यक्ष राजेंद्र बांदल व संचालिका रेखा बांदल व मुख्याध्यापिका सौ निर्मल पंडीत यांच्या मार्गदर्शनाखाली शाळेच्या पर्यवेक्षक शुभा कुलकर्णी, सचिन खोडके व माधुरी धावडे व संमती चौगुले यांनी केले.कार्यक्रमाचे सूत्रसंचालन कविता पाटील व श्रेया गायकवाड यांनी केले होते. कार्यक्रमाची सांगता माऊलीच्या गजरात पालखीचे प्रस्थान करून करण्यात आली.