Pune News : महापालिकेच्या दहा जागांसाठीच्या स्वीकृत नगरसेवकांची निवड उद्या, बुधवारी मुख्यसभेत होणार आहे. मात्र, या निवडीत आठच नगरसेवक निवडले जाण्याची चर्चा राजकीय वर्तुळात रंगली आहे. ज्या दहा उमेदवारांचे अर्ज दाखल करण्यात आले होते. त्यातील दोन उमेदवारांची कागदपत्रे अपूर्ण असल्याने ते छाननीत बाद झाले असल्याची चर्चा आहे. त्यामुळे, उद्याच्या मुख्यसभेत दहावजी केवळ आठच जणांची स्वीकृत नगरसेवक म्हणून निवड केली जाण्याची शक्यता आहे. ही निवड मुख्यसभेत होणार असताना मंगळवारी रात्री उशीरापर्यंत निवडणूक विभागाकडून दहा सदस्यांच्या निवडीचा प्रस्ताव नगरसचिव कार्यालयात दाखल करण्यात आलेला नव्हता.त्यामुळे, मुख्यसभेत आयत्यावेळी हा प्रस्ताव दाखल केला जाणार असल्याची चर्चा आहे. निवडणुकीनंतर पक्षीय बलाबलानुसार महापालिकेत १० स्वीकृत सदस्य निवडले जाणार आहेत. त्यानुसार या जागांसाठी भाजप, राष्ट्रवादी तसेच काॅंग्रेसच्या उमेदवारांनी आपले अर्ज प्रशासनास सादर केले असून, प्रशासनाकडून या अर्जांची छाननी करून पात्र अर्जांच्या नावांची यादी जाहीर केली जाणार आहे. त्यात भाजपचे सात, राष्ट्रवादीचे दोन तर काँग्रेसचा एक स्वीकृत सदस्य असणार आहेत. त्यांचे अर्जही या पक्षांनी ९ मार्च रोजी सादर केले होती. त्यानंतर सकाळी ११ ते दुपारी २ या वेळेत उमेदवारांनी आपले अर्ज आयुक्तांना सादर केलेले होते. त्यानुसार, आयुक्तांकडून या अर्जांच्या छाननीसाठी स्वतंत्र समितीही नेमण्यात आली होती. या समितीकडून मंगळवारी अखेरपर्यंत या अर्जांची छाननी सुरू होती. महापालिका अधिनियमानुसार, सभागृह अस्तित्वात आल्यानंतर नजीकच्या पहिल्या मुख्यसभेत या सदस्यांची नियुक्ती करणे आवश्यक आहे. त्यामुळे, प्रशासनाकडून जे आठ अर्ज पात्र झाले आहेत. त्यांचीच नावे मुख्यसभेत सादर करण्याचा निर्णय घेतला असल्याची चर्चा आहे. त्यामुळे, अर्ज बाद झालेले ते दोन उमेदवार कोण याची चर्चा प्रशासकीय तसेच राजकीय वर्तुळात रंगली आहे. कोणी भरले होते अर्ज? भाजप प्रियंका शेंडगे जयप्रकाश पुरोहित रवी साळवेकर विश्वास ननावरे उदय लेले राजेंद्र काकडे नीलेश कोंढाळकर राष्ट्रवादी काॅग्रेस दत्तात्रय धनकवडे राकेश कामठे काँग्रेस सुनील शिंदे
