प्रभात वृत्तसेवा
पुणे – राज्य बोर्डासह अन्य सर्व बोर्डाच्या शाळांमध्ये मराठी भाषेचे अध्ययन व अध्यापन करणे हे अनिवार्य असून, राज्यगीत गायनसुद्धा केले जावे, असे प्रतिपादन शालेय शिक्षण मंत्री दादाजी भुसे यांनी बैठकीत केले.सर्व बोर्डाच्या समन्वयक, प्राचार्य व शिक्षण विभागाचे अधिकारी यांच्या सहविचार बैठकीचे मंत्रालयीन दालनात आयोजन करण्यात आले होते. त्यावेळी शालेय शिक्षण मंत्री दादा भुसे बोलत होते.

यावेळी शालेय शिक्षण व क्रीडा विभागाचे प्रधान सचिव रणजित सिंह देओल, शिक्षण आयुक्त सच्छिंद्र प्रताप सिंह, राज्य शैक्षणिक संशोधन व प्रशिक्षण परिषदेचे राहुल रेखावार, शालेय शिक्षण विभागाचे उपसचिव तुषार महाजन, कक्ष अधिकारी मृणाली काटेंगे, मुंबई विभागाचे विभागीय शिक्षण उपसंचालक राजेश कंकाळ, शिक्षण निरीक्षक वैशाली वीर यांच्यासह सीबीएसई, आयसीएसई, इंटरनॅशनल बोर्डाचे विविध समन्वयक व बोर्डाच्या शाळांचे प्राचार्य आदी मान्यवर उपस्थित होते.

सर्व बोर्डाच्या समन्वयक, प्राचार्य यांनी यावेळी अन्य बोर्डाच्या शाळांमध्ये सुरू असलेले विविध उपक्रम, अध्ययन-अध्यापनाचे प्रयोग, मूल्यमापन पद्धती याविषयी माहिती दिली.आयसीई, सीबीएसई, केंब्रिज बोर्डातील शाळेमध्ये विद्यार्थ्यांच्या इयत्ता दहावीच्या गुणपत्रिकेवरसुद्धा मराठी हा विषय आला पाहिजे. त्यासाठी विविध बोर्डाशी पत्रव्यवहार केला जाईल.

स्टेट बोर्डाप्रमाणे छत्रपती शिवाजी महाराज यांच्या अभ्यासक्रमाचा आयसीएसई बोर्डाच्या पुस्तकामध्येही समावेश झाला पाहिजे. आयबी बोर्डमध्ये मानव्यविद्या या विषयांमध्ये महाराष्ट्राचा इतिहास शिकवण्याबाबतही विचार केला जावा. दिव्यांग विद्यार्थी, कमी अध्ययन क्षमता असणारे विद्यार्थी यांचाही सर्व समावेशक शिक्षणात समावेश केला जावा, अशा सूचनाही दादा भुसे यांनी दिल्या आहेत.