Pune News – शहरातील वाढत्या धूलिकण प्रदूषणात नव्याने सुरू असलेल्या बांधकामांचा मोठा वाटा असल्याचे लक्षात घेऊन महापालिकेने कठोर पाऊल उचलले आहे. हवेत वाढत असलेल्या पीएम २.५ व पीएम १० धूलिकणांच्या पार्श्वभूमीवर शहरातील ५ हजार चौरस मीटरपेक्षा जास्त क्षेत्रावर सुरू असलेल्या सर्व बांधकाम प्रकल्पांवर सेन्सर-आधारित हवा गुणवत्ता तपासणी प्रणाली बसविणे बंधनकारक करण्यात आले आहे. या प्रणालीची सुरुवात बुधवारी महापालिकेत महापौरांच्या उपस्थितीत करण्यात आली. या वेळी बांधकाम क्षेत्रातील वायू प्रदूषण नियंत्रण व उपाययोजना या विषयावर महापालिका प्रशासन, वर्ल्ड रिसोर्सेस इन्स्टिट्यूट इंडिया आणि भारतीय उष्ण कटिबंधीय हवामानशास्त्र संस्था यांच्या संयुक्त विद्यमाने कार्यशाळा आयोजित करण्यात आली होती. महापौर मंजुषा नागपुरे, सभागृह नेते गणेश बिडकर, महापालिका आयुक्त नवल किशोर राम, अतिरिक्त आयुक्त पृथ्वीराज बी. पी., अतिरिक्त आयुक्त पवनीत कौर, शहर अभियंता अनिरुद्ध पावसकर, अपर पोलीस आयुक्त मनोज पाटील, क्रेडाई पुणेचे सहसचिव तेजराज पाटील, तसेच मराठी बांधकाम व्यावसायिक संघटनेचे पदाधिकारी उपस्थित होते. शहरात आतापर्यंत सुमारे १५३ बांधकाम प्रकल्पांवर ही यंत्रणा बसविण्यात आली असून, संबंधित व्यावसायिकांनी स्वखर्चाने सेन्सर दर्शनी भागात बसवले आहेत. त्या माध्यमातून प्रदूषणाचे रिअल-टाइम निरीक्षण महापालिकेकडून केले जाणार असल्याचे प्रात्यक्षिकही दाखविण्यात आले. वेगाने होत असलेल्या शहरीकरणामुळे बांधकाम क्षेत्रातून मोठ्या प्रमाणावर धूळ निर्माण होत आहे. ऑटोमोटिव्ह रिसर्च असोसिएशन ऑफ इंडिया यांच्या २०२२ च्या अहवालानुसार पीएम १० धुलिकणांच्या उत्सर्जनात बांधकाम क्षेत्राचा सुमारे २३ टक्के वाटा आहे. त्यामुळे धूळ नियंत्रणासाठी तांत्रिक उपाययोजना करणे अत्यावश्यक ठरत असल्याचे महापालिकेकडून स्पष्ट करण्यात आले. १५३ प्रकल्पांवर बसविले सेन्सर सध्या पुण्यात ५ हजार चौरस मीटरपेक्षा अधिक क्षेत्रावर ६३८ बांधकाम प्रकल्प सुरू आहेत. त्यापैकी १५३ प्रकल्पांवर सेन्सर बसविण्यात आले असून, उर्वरित प्रकल्पांवरही येत्या काही दिवसांत ही प्रणाली बसवली जाणार असल्याची माहिती महापौर नागपुरे यांनी या कार्यक्रमानंतर पत्रकारांशी बोलताना दिली.
