Pune News :  पुणे शहराच्या पूर्व भागातील आळंदी-मरकळ रस्त्यालगत तुळापूर परिसरातील एका खासगी बंगल्यात सुरू असलेल्या कथित ‘रेव्ह पार्टी’वर पुणे पोलिसांच्या गुन्हे शाखेने मध्यरात्री धाड टाकत मोठी कारवाई केली. या कारवाईत पार्टीत उपस्थित असलेल्या सुमारे ६० ते ७० तरुण-तरुणींना चौकशीसाठी ताब्यात घेण्यात आले असून, नशेसाठी वापरले जाणारे काही संशयित पदार्थ आणि इतर साहित्य जप्त करण्यात आल्याची प्राथमिक माहिती समोर आली आहे.

पोलिस सूत्रांनी दिलेल्या माहितीनुसार, ‘प्रोजेक्ट एक्स’ या नावाने आयोजित करण्यात आलेल्या या कार्यक्रमात मोठ्या आवाजातील संगीत, मद्यपान आणि रात्री उशिरापर्यंत सुरू असलेला धांगडधिंगा याबाबत माहिती मिळाल्यानंतर गुन्हे शाखेच्या पथकाने छापा टाकला. संबंधित ठिकाण हे लोणीकंद पोलीस ठाण्याच्या हद्दीत येत असून, कार्यक्रमासाठी आवश्यक परवानग्या घेण्यात आल्या होत्या की नाही, याचीही पडताळणी सुरू आहे.

कारवाईदरम्यान काही तरुण-तरुणी मद्यधुंद अवस्थेत आढळल्याचे सांगितले जात आहे. तसेच, पार्टीमध्ये अमली पदार्थांचा वापर झाल्याचा संशय व्यक्त करण्यात आला असून, जप्त करण्यात आलेल्या संशयित पदार्थांचे नमुने तपासणीसाठी न्यायवैद्यक प्रयोगशाळेकडे पाठविण्याची प्रक्रिया सुरू आहे. वैद्यकीय चाचण्यांनंतरच अमली पदार्थांच्या वापराबाबत स्पष्टता येणार असल्याचे पोलिसांनी सांगितले.

उच्चशिक्षित तरुण-तरुणींचा सहभाग

माहितीनुसार, या कार्यक्रमात आयटी आणि विविध व्यावसायिक क्षेत्रांत कार्यरत उच्चशिक्षित तरुण-तरुणींचा सहभाग होता. पोलिसांकडून आयोजक, बंगल्याचे मालक, कार्यक्रम व्यवस्थापक आणि उपस्थित व्यक्तींची चौकशी केली जात असून, आर्थिक व्यवहार, प्रवेश शुल्क आणि परवानग्यांबाबतही तपास सुरू आहे.

दरम्यान, शहरातील हॉटेल्स, पब आणि क्लबवर नियमांचे कठोर पालन करण्यासाठी अलीकडेच कारवाईचा बडगा उगारल्यानंतर अशा प्रकारचे कार्यक्रम शहराच्या उपनगरांमध्ये तसेच पुणे ग्रामीणच्या सीमेलगतच्या भागांमध्ये आयोजित केले जात असल्याचे या घटनेतून पुन्हा एकदा समोर आले आहे. त्यामुळे अशा बेकायदेशीर कार्यक्रमांवर नियंत्रण ठेवण्यासाठी पोलिसांकडून विशेष मोहीम राबविण्याची शक्यता व्यक्त केली जात आहे.

पोलिसांकडून अद्याप अधिकृत गुन्हा दाखल करण्याची प्रक्रिया सुरू असून, तपास पूर्ण झाल्यानंतरच नेमक्या कायदेशीर कारवाईबाबत निर्णय घेतला जाणार आहे. त्यामुळे अमली पदार्थांचा वापर, बेकायदेशीर मद्यविक्री किंवा अन्य नियमभंगाबाबत अंतिम निष्कर्ष तपास अहवालानंतरच स्पष्ट होणार आहेत.

हेही वाचा: 

LPG Cylinder Price : सर्वसामान्यांचे बजेट कोलमडले! घरगुती गॅस सिलेंडरच्या दरात मोठी वाढ