प्रभात वृत्तसेवा पुणे – बिबट्यापासून संरक्षण करण्यासाठी शस्त्र वापरण्याचे वनविभागाने आदेश दिले आहेत अशी अफवा औंध भागात पसरली आहे. परंतु, असे कोणतेही आदेश दिले नसल्याचे स्पष्टीकरण वनविभागाने दिले आहेत. सोशल मीडियावर फिरणाऱ्या अशाप्रकारच्या मेसेजवर विश्वास ठेवू नये, असे आवाहन प्रशासनाकडून करण्यात आले आहे. औंध येथे रविवारी (दि.२३ नोव्हेंबर) बिबट्या आढळून आला होता, त्यानंतर वनविभागाने नागरिकांना बिबट्यापासून स्वसंरक्षणासाठी कोयता, तलवार आदी धारदार शस्त्रे घेऊन फिरण्याचे आदेश, सूचना दिल्या आहेत, अशी गंभीर स्वरूपाची अफवा मोबाइल मेसेजद्वारे पसरली. परंतु, अशा कोणत्याही सूचना नसून सोशल मीडियावर फिरणारा मेसेज पूर्णपणे खोटा आणि निराधार आहे. असे कोणत्याही प्रकारे असे आदेश, सूचना वनविभागाकडून देण्यात आलेल्या नाहीत, असे विभागाने स्पष्ट केले आहे. वनविभागाचे आवाहन – कोणत्याही अफवांवर विश्वास ठेवू नये – अफवा पसरविणाऱ्यांवर कारवाइ करणार – सतर्क रहा, अधिकृत स्त्रोतांच्या माहितीची खात्री करावी. “बिबट्या संदर्भातील सर्व परिस्थितीवर पुणे वनविभाग, रेस्क्यूटीम सातत्याने लक्ष ठेवून आहेत. नागरिकांच्या सुरक्षिततेसाठी आवश्यक ती सर्व पावले उचलली जात आहेत, त्यामुळे कृपया कोणताही अफवा पसरवू नयेत.” – उपवनसंरक्षक, पुणे वनविभाग, पुणे
