Pune News : महापालिका आयुक्तांच्या अंदाजपत्रकात पर्वती विधानसभा मतदारसंघातील विकासकामासाठी तब्बल ३२ कोटी ८३ लाखांचा निधी राखून ठेवण्याचा प्रस्ताव आहे. यावरून पालिकेत चांगलाच गोंधळ उडला आहे. बुधवारी होणाऱ्या मुख्यसभेच्या पत्रिकेवर हा विषय मान्यतेसाठी आहे. हा आर्थिक विषय स्थायी समितीच्या मान्यतेने मुख्यसभेत आला असला तरी, महापालिका आयुक्त नवल किशोर राम यांनी मात्र हा विषय आपण मान्यच केला नसल्याचा दावा केला आहे. तसेच उद्या तो मागे घेण्याचा प्रस्ताव दिला जाणार असल्याची माहितीही त्यांनी पत्रकारांशी बोलताना दिली. त्यामुळे, आयुक्तांच्या मान्यतेविना हा प्रस्ताव मुख्यसभेत आलाच कसा, असा प्रश्न आहे. काय आहे प्रकरण ? पर्वती विधानसभा मतदारसंघातील विविध कामांसाठी निधी मिळावा, यासाठी मिसाळ यांनी मे २०२५ मध्ये महापालिका प्रशासनाला पत्र दिले होते. त्यानंतर चार महिन्यांनी पथ विभागालाही कामांसंदर्भात पत्र दिले. प्रशासनाने या कामांचे पूर्वगणपत्रक तयार करून वित्तीय समितीची मान्यता घेतली. मात्र, आयुक्तांनी हा प्रस्ताव सलग पाच ते सहा महिने पुढे ढकलला. तसेच हा मंजूर केला जाणार नसल्याचे तत्कालीन पथ विभागाचे प्रमुख अनिरूध्द पावसकर यांच्यासह अतिरिक्त आयुक्त ओमप्रकाश दिवटे यांनाही स्पष्ट केले. त्यानंतरही अनेकदा हा प्रस्ताव मंजुरीसाठी आल्यावर आयुक्तांनी तो फेटाळून लावला. दरम्यान, ६ फेब्रुवारी रोजी झालेल्या स्थायी समितीच्या बैठकीत या प्रस्तावाला मान्यता मिळाल्याची नोंद आहे. स्थायी समितीत मंजूर झाल्याने हा विषय मुख्यसभेत मान्यतेसाठी ठेवला आहे. मात्र, आता पालिका आयुक्त राम, अतिरिक्त आयुक्त दिवटे तसेच तत्कालीन पथ विभागाचे प्रमुख अनिरूध्द पावसकर यांनी याप्रकरणी हात वर केले असून हा प्रस्ताव आलाच कसा याची माहिती नसल्याचे पत्रकारांशी बोलताना सांगितले. ‘हा प्रस्ताव मागे घेण्याच्या सूचना दिल्या आल्या आहेत. हा प्रस्ताव सहा महिन्यांपूर्वी आला होता. त्यानंतर वेळोवेळी स्थायी समितीत तो मान्य केला जाणार नसल्याचे सांगण्यात आले होते. त्यानंतरही मागील स्थायी समितीत हा मंजूर झाल्याचे दिसत आहे. आयत्यावेळी माहिती न देता हा मान्यतेसाठी ठेवला का याची चौकशी केली जाईल. मात्र, अशा प्रकारे निधी दिला जाणार नाही.’ – नवल किशोर राम ( महापालिका आयुक्त) Pune News : थकबाकीचे बिलच चुकीचे? महापालिकेची पाण्याच्या थकबाकी वसुलीबाबत भूमिका