प्रभात वृत्तसेवा
पुणे – पुणे महापालिकेच्या वतीने पुणे शहरात मेट्रोपोलिटन सर्व्हिलन्स युनिट कार्यन्वित करण्यात आले असून, त्याअंतर्गत कार्यरत मनुष्यबळाचे प्रशिक्षण पुणे महापालिका आणि एनसीडीसी, दिल्ली यांच्या मार्फत दिनांक २३ ते २५ सप्टेंबर दरम्यान आयोजित करण्यात आले होते. प्रशिक्षणाच्या शेवटच्या दिवशी (२५ सप्टेंबर) महापालिका आयुक्त नवल किशोर राम यांच्या अध्यक्षतेखाली मेट्रोपोलिटन सर्व्हिलन्स युनिट चे उद्दिष्ट आणि एमएसयु अंतर्गत कामकाजाची माहिती इतर विभागांनाही होण्यासाठी तसेच पुढील कालावधीमध्ये काही साथरोग उद्भवल्यास साथरोग प्रतिबंधात्मक उपाययोजना करण्यासाठी सर्व विभागांमध्ये योग्य समन्वय असण्याच्या दृष्टीने विविध विभागांची समन्वय सभा आयोजित करण्यात आली.

या सभेत विमानतळ प्राधिकरण, भारतीय हवामान विभाग, सार्वजनिक आरोग्य प्रयोगशाळा, रेल्वे विभाग, राज्य अन्न व औषध प्रशासन, एनआयव्ही, डब्ल्यूएचओ, राज्य किटकजन्य आजार नियंत्रण विभाग, राज्य पशु-संवर्धन विभाग, महाराष्ट्र प्रदूषण नियंत्रण विभाग, भारती विद्यापीठ वैद्यकीय महाविद्यालय, भारतरत्न अटलबिहारी वाजपेयी वैद्यकीय महाविद्यालय, राज्य सर्वेक्षण विभाग, पुणे डॉक्टर्स असोसिएशन, पुणे इंडिअन अकॅडेमी ऑफ पेडीयाट्रिक्स, पुणे महापालिकेकडील पाणी पुरवठा, मल निस्सारण, शिक्षण, माहिती तंत्रज्ञान, विद्युत, भवन रचना आणि आरोग्य विभागाकडील प्रतिनिधी उपस्थित असल्याचे एमएसयु प्रमुख तथा सहाय्यक आरोग्य अधिकारी डॉ. वैशाली जाधव यांनी सांगितले.

मेट्रोपोलिटन सर्व्हिलन्स युनिटमुळे पुण्यातील संसर्गजन्य आजारांच्या साथीचे वेळेत निदान, प्रतिबंध आणि नियंत्रण यामध्ये मोठी मदत होणार आहे, असे आयुक्त नवल किशोर राम म्हणाले. MSU युनिटच्या स्थापनेमुळे विविध क्षेत्रातील आरोग्य कर्मचारी, स्वयंसेवक व अधिकारी यांना तांत्रिक प्रशिक्षण मिळणार असून, यामुळे पुण्यातील सार्वजनिक आरोग्य व्यवस्थेत आणखी सुधारणा होणार असल्याचे आयुक्तांनी नमूद केले.

हे युनिट शहराच्या आरोग्य व्यवस्थेसाठी एक महत्वाचे पाऊल आहे. या युनिटच्या माध्यमातून वेळेवर माहिती संकलन, रोगांचे विश्लेषण आणि त्यावर आधारित त्वरित उपाययोजना राबविणे शक्य होईल, नागरिकांच्या आरोग्य रक्षणासाठी ही एक प्रभावी यंत्रणा ठरेल.” हे युनिट भारतातील सर्वोत्तम, सुसज्ज व अत्याधुनिक होण्या करिता भवन रचना विभागाने प्राधान्याने काम करण्याचाबत सूचना दिल्या.