पुणे – पार्टी साजरी करणाऱ्या मद्यधुंद अवस्थेतील तरुणांनी रस्त्यावर गोंधळ धालून दारूच्या बाटल्या फोडल्याची घटना मुंढवा परिसरात रविवारी रात्री घडली. या घटनेनंतर या भागातील रहिवाशांनी थेट हाॅटेल मालकाला विचारला केली. यामुळे हाॅटेल मालक आणि रहिवाशांमध्ये वाद झाल्याने रविवारी रात्री मुंढवा परिसरात तणाव निर्माण झाला होता. या घटनेची माहिती मिळताच मुंढवा पोलिसांनी तेथे धाव घेऊन परिस्थिती नियंत्रणात आणली.

मुंढवा भागात नव्याने एक पब आणि हॉटेल सुरू झाले आहे. रविवारी ( १७ ऑगस्ट) हाॅटेलमध्ये पार्टीचे आयोजन करण्यात आले होते. रात्री दहाच्या सुमारास मध्यधुंद तरुणांनी परिसरात गोंधळ घातला. रस्त्यात दारूच्या बाटल्या फोडण्यात आल्या. या वेळी स्थानिक रहिवाशांनी त्यांना जाबा विचारला.

तेव्हा मद्यधुंद अवस्थेतील तरुणांनी रहिवाशांना शिवीगाळ केली, असा आरोप रहिवाशांनी केला. या घटनेनंतर रहिवशांनी हाॅटेलमध्ये धाव घेतली आणि मालकाला जाब विचारला. बाचााबाची झाल्यााने हाॅटेलच्या परिसरात तणाव निर्माण झाले. हाणामारीपर्यंत वाद पोहोचल्याने त्वरीत या घटनेची माहिती पोलिसांना कळविण्यात आली. मुंढवा पोलीस ठाण्याच्या वरिष्ठ पोलीस निरीक्षक माया देवरे आणि पोलिसांनी घटनास्थळी धाव घेतली.

पोलिसांनी त्वरीत हस्तक्षेप करुन परिस्थिती नियंत्रणात आणली. पोलिसानी हाॅटेलमालक आणि रहिवाशांची बाजू ऐकून घेतली. हाॅटेलमालकाला पाोलिसांनी सूचना दिल्या. हाॅटेलच्या परिसरात गैरप्रकार झाल्यास कारवाई करण्यात येईल, अशा सूचना हाॅटेलमालकाला पोलिसांनी दिल्या आहेत.