Pune news : गेल्या चार दिवसांपासून सुरू असलेल्या मुसळधार पावसामुळे पुणे शहरात झाडपडीच्या घटनांमध्ये मोठी वाढ झाली आहे. अनेक ठिकाणी मोठमोठी झाडे आणि फांद्या उभ्या वाहनांवर कोसळल्याने कार, रिक्षा आणि दुचाकींचे मोठे नुकसान झाले. या पार्श्वभूमीवर पुणे महापालिकेच्या झाड छाटणी धोरणावर पुन्हा एकदा चर्चा सुरू झाली आहे.

दरम्यान, “झाडपडीच्या घटनांबाबत काही प्रमाणात पर्यावरण संघटनांचा विरोधही अडचणीचा ठरतो,” असे वक्तव्य करत पुण्याच्या महापौर मंजुषा नागपुरे यांनी नवा वाद ओढवून घेतला आहे.

झाडपडीच्या वाढत्या घटनांच्या पार्श्वभूमीवर आपत्ती व्यवस्थापन विभागासोबत महत्त्वाची बैठक आयोजित करण्यात आली असून, नागरिकांच्या तक्रारींसाठी लवकरच स्वतंत्र हेल्पलाइन क्रमांक जाहीर करण्यात येणार असल्याची माहिती महापौर मंजुषा नागपुरे यांनी दिली.

झाडपडीच्या घटनांमध्ये कॉन्ट्रोवर्सी दरवर्षी होत असते. काही अशी संघटना आहेत ज्यांना असं वाटतं झाड आणि झाडांच्या फांद्या कधी तोडल्या जाऊ नये. झाडाच्या फांद्या तोडल्यानंतर त्यांच्या तक्रारी येतात झाड का तोडलं? अशी विचारणा होते.

जंगलातील झाडांचे वजन वाढलं तर त्या कोलमडून पडतात, तिथे जीवित हानी होत नाही पण तसंच शहरात मात्र चित्र वेगळं असते, झाडांचं वजन वाढलं की त्याच्या फांद्या काढाव्या लागतात छाटाव्या लागतात. तसं वर्षभर केलं तरच झाडपडीच्या घटना कमी होतात.

अर्थात पुणे शहरात झाड तज्ञ खूप आहेत त्यांनी आम्हाला मार्गदर्शन करावं. महापालिकेने धोकादायक झाडांचे सर्वेक्षण केलं आहे. मात्र काही पर्यावरण संघटनांकडून त्याला विरोध केला जातो. आणि झाड पडल्यानंतर नागरिकांची ओरड असते की झाडांची छाटणी का केली नाही.

अधिकारी सुद्धा अडकतात आम्ही सुद्धा थांबतो काम होत नाही. झाडांच्या संदर्भात तज्ञांनी पुढे यावं आमच्याशी बोलावं आणि मार्ग काढावा. असं देखील त्या म्हणाल्या.