प्रभात वृत्तसेवा
पुणे – पुणे महापालिकेत बाह्यस्रोताद्वारे काम करणाऱ्या कंत्राटी कामगारांना किमान वेतनासह दिवाळी बोनस, रजावेतन व घरभाडा भत्ता लागू करण्याचा प्रस्ताव महापालिका प्रशासनाकडून स्थायी समितीसमोर ठेवण्यात आला आहे. स्थायी समिती आणि मुख्य सभेची मान्यता मिळाल्यानंतर यावर कार्यवाही केली जाणार आहे.या प्रस्तावानुसार बोनस, रजावेतन व घरभाडे भत्ता लागू केल्यास अंदाजे ४५ कोटींचा खर्च होणार असल्याचे नमूद करण्यात आले आहे. महापालिकेत सध्या १०,२१६ कंत्राटी कामगार सेवा देत आहेत.

ज्यात १,३८२ कुशल, ४६६ अर्धकुशल आणि ८,३६८ अकुशल कामगारांचा समावेश आहे. पुणे महापालिका कामगार युनियन आणि इतर कामगार संघटनांनी वेळोवेळी बोनस, रजावेतन आणि घरभाडे भत्त्याची मागणी केली आहे.प्रशासनाने आयुक्तांना दिलेल्या अभिप्रायानुसार, यापूर्वी ठेकेदारांकडून नेमण्यात आलेल्या कंत्राटी कामगारांना महाराष्ट्र दुकाने व व्यापारी आस्थापना अधिनियमानुसार वेतन दिले जात होते. त्यात ठेकेदाराद्वारे बोनस, रजावेतन व घरभाडे भत्ता दिला जात होता.

मात्र, २०२१ पासून किमान वेतन अधिनियमानुसार वेतन देण्यास सुरुवात झाली असून, त्यात बोनस, रजावेतन व घरभाडे भत्त्यांचा समावेश नाही, तसेच विविध अधिनियम पुणे महापालिकेवर लागू न झाल्यामुळे पूर्वी बोनस व घरभाडे भत्ता दिला जात नव्हता. मात्र, महापालिका आयुक्तांनी बोनस देण्याचा निर्णय घेतला आहे. त्यामुळे यासाठी धोरण निश्चितीही करावी लागणार आहे.