मांजरी :  महसूल विभागातील हवेली पूर्व अप्पर तहसीलदार, थेऊर मंडल अधिकारी व मांजरी बुद्रुक गाव कामगार तलाठी यांच्या विरोधात मांजरी बुद्रुकचे माजी सरपंच शिवराज घुले यांनी आक्रमक भूमिका घेत गावात आणि संबंधित शासकीय कार्यालयांच्या प्रवेशद्वारांवर फ्लेक्स झळकावल्याने मोठी खळबळ उडाली आहे. मांजरी बुद्रुक गावकामगार तलाठी, अप्पर तहसीलदार लोणी काळभोर आणि मंडल अधिकारी यांच्यावर नागरिकांच्या विविध कामांसाठी पैशांची मागणी केल्याचे गंभीर आरोप या लावलेल्या फ्लेक्स मधून करण्यात आले आहेत.

विशेष म्हणजे, शिवराज घुले यांनी नागरिकांसमवेत जाऊन संबंधित तीनही कार्यालयांच्या प्रवेशद्वारावर हे फ्लेक्स लावत प्रशासनालाच थेट आव्हान दिले आहे. “कोणत्याही शासकीय कामासाठी पैशांची मागणी झाल्यास नागरिकांनी अँटी करप्शन ब्युरोच्या १०६४ हेल्पलाईनवर तक्रार करावी,” असे आवाहनही यातून करण्यात आले आहे. याशिवाय घुले यांनी आपला स्वतःचा मोबाईल क्रमांकही दिला आहे .याबाबत अप्पर तहसीलदार, मंडल अधिकारी व मांजरी बुद्रुक तलाठी यांनी आपली प्रतिक्रिया व्यक्त केली आहे .

 

ही जनजागृती चांगली आहे. तलाठ्यांची याबाबत चौकशी केली जाईल.
तृप्ती कोलते-पाटील
अप्पर तहसीलदार, लोणी काळभोर (पूर्व हवेली, जिल्हा पुणे).

अप्पर तहसीलदार-पूर्व हवेली, थेऊर मंडल अधिकारी आणि मांजरी बुद्रुक गाव कामगार तलाठ्यांकडून एका ठराविक घटकाला पाठीशी घातले जात आहे. तर सर्वसामान्य नागरिकांना त्यांच्या हक्काच्या कामासाठी पैशाची मागणी केली जात. फेरफार ,सातबारा उतारा, बोजा चढवणे -उतरवणे, वारस हक्क नोंदी व इतर महसूल कामासाठी या विभागाकडून सर्वसामान्य नागरिकांना मोठ्या रकमेची मागणी केली जात असल्याच्या तक्रारी वारंवार आल्यानंतर आपण आज नागरिकांना सोबत घेऊन या ठिकाणी जनजागृतीसाठी हा फलक लावला आहे .यातून या अधिकाऱ्यांनी बोध न घेतल्यास तीव्र स्वरूपाचे आंदोलन करण्यात येईल.
शिवराज घुले
माजी सरपंच, मांजरी बुद्रुक ग्रामपंचायत.

कोणालाही हेतूपरस्पर त्रास देण्याचा प्रशासनाचा हेतू नाही. मांजरी बुद्रुक येथील रामोशी वतनाचे बोजे दाखल केल्याने त्यांनी वैयक्तिक स्वरूपाचा राग व्यक्त केला आहे. मी गेल्या २५ वर्षात कोणाकडेही कधीही काहीही मागितले नाही.
किशोर जाधव
मंडल अधिकारी थेऊर

फेरफार ,सातबारा उतारे किंवा इतर कोणत्याही कामासाठी शासकीय नियमानुसार असलेली फी घेतली जाते. जास्तीचे पैसे कोणाकडूनही मागितले जात नाहीत. याशिवाय एजंट किंवा मध्यस्थी व कुठलाही गैरप्रकार होऊ नये यासाठी कार्यालयाच्या प्रवेशद्वारावरती याआधीच नोटीस लावलेली आहे.
सुवर्णा लोहकरे
तलाठी ,मांजरी बुद्रुक