Pune-Nashik high-speed train : रेल्वे मंत्री आश्विनी वैष्णव यांनी लोकसभेत पुणे-नाशिक द्रूतगती रेल्वे प्रकल्पाचा मार्ग अखेर अहिल्यानगर-शिर्डीमार्गे निश्चित झाल्याची घोषणा केली आहे. या मार्गामुळे औद्योगिक, शैक्षणिक, व्यावसायिक आणि धार्मिक क्षेत्रांना मोठी चालना मिळणार आहे. गेल्या अनेक वर्षांपासून प्रस्तावित असलेला हा प्रकल्प मूळात थेट पुणे-नाशिक असा जाणार होता. मात्र, जुन्नर तालुक्यातील खोडद येथील आंतरराष्ट्रीय स्तरावरील ‘जायंट मीटरव्हेव रेडिओ टेलिस्कोप’ (GMRT) प्रकल्पाला या मार्गामुळे अडथळा येत होता. विज्ञानाच्या संरक्षणासाठी, जुन्नरमार्गे जाणारा मार्ग रद्द करून पुणे-अहिल्यानगर-शिर्डी-नाशिक हा नवीन मार्ग निश्चित करण्याचा निर्णय घेण्यात आला, असे रेल्वेमंत्री वैष्णव यांनी स्पष्ट केले. या नवीन मार्गामुळे केवळ प्रवासाचाच नव्हे, तर धार्मिक पर्यटनालाही मोठा फायदा होणार आहे. त्र्यंबकेश्वर (१२ ज्योतीर्लिंगांपैकी एक) आणि शिर्डीचे साईबाबा मंदिर ही दोन प्रमुख धार्मिक स्थळे जोडली जातील. तसेच, हा रेल्वे मार्ग चाकण औद्योगिक वसाहतीतून जाणार असल्याने मालवाहतूक खर्च कमी होऊन ऑटोमोबाईल, इलेक्ट्रॉनिक्स आणि अभियांत्रिकी क्षेत्राला लाभ मिळेल. यामुळे नवे उद्योग आणि गुंतवणुका आकर्षित होऊन रोजगार निर्मितीलाही बूस्ट मिळणार आहे. नवीन मार्ग असा असेल: पुणे – चाकण औद्योगिक वसाहत – अहिल्यानगर – निंबळक – पुणतांबा – शिर्डी – नाशिक. नाशिक ते शिर्डी, तसेच पुणे ते अहिल्यानगर (१३३ कि.मी.) या मार्गांचे DPR पूर्ण झाले असून, काही ठिकाणी दुहेरीकरणाचे काम सुरू आहे. हा प्रकल्प आता अंतिम टप्प्यात असून, महाराष्ट्राच्या विकासाला नवी दिशा देणारा ठरेल. या घोषणेमुळे या भागातील नागरिकांच्या आशा पल्लवित झाल्या आहेत.
