पुणे – ससून रुग्णालयात उपचाराच्या नावाखाली कारागृहामधून बाहेर येणार्‍या गुन्हेगारांवर आता पोलिसांची ‘सर्जिकल स्ट्राईक’ कार्यवाही होणार आहे. ससून प्रशासनाच्या मदतीने अशा गुन्हेगारांची माहिती घेतली जाईल. या माध्यमातून गुन्हेगारांचे ‘मेडिकल टुरिझम’ बंद केले जाणार असून, त्यासाठी कठोर उपाययोजना राबविल्या जातील, असा इशारा पोलीस आयुक्त अमितेश कुमार यांनी दिला आहे.

ससून रुग्णालयात नव्याने उभारण्यात आलेल्या पोलिस चौकीचे उद्घाटन पोलीस आयुक्त अमितेश कुमार यांच्या हस्ते झाले. यावेळी ते बोलत होते. याप्रसंगी आमदार सुनील कांबळे, सहआयुक्त रंजनकुमार शर्मा, गुन्हे शाखेचे अप्पर पोलिस आयुक्त पंकज देशमुख, अप्पर पोलिस आयुक्त राजेश बनसोडे, उपायुक्त निखिल पिंगळे, उपायुक्त स्मार्तना पाटील, ससूनचे अधीक्षक यल्लप्पा जाधव, बांधकाम विभागाच्या कीर्ती कुंजीर आदी उपस्थित होते.

आयुक्त कुमार म्हणाले, ससूनमध्ये उपचार घेण्याच्या नावाखाली काही गुन्हेगार दीर्घकाळ वास्तव्य करीत असल्याच्या तक्रारी वेळोवेळी समोर आल्या आहेत. यापैकी काही आरोपींनी रुग्णालयातून पळ काढल्याच्याही घटना घडल्या आहेत. आता या प्रकारांना आळा घालण्यासाठी ससूनमधून सुरू असलेल्या तथाकथित ‘मेडिकल टुरिझम’वर चाप बसवण्यात येईल. रुग्णालयातील पोस्टमार्टम रिपोर्ट आणि एमएलसी रिपोर्ट संबंधित पोलिस ठाण्याला लवकरात लवकर पाठवले जातील. यामुळे रुग्णांचा आणि डॉक्टरांचा वेळ वाचेल आणि कारवाई तत्काळ करता येईल.

…पोलीस निरीक्षक दर्जाचा अधिकारी देणार
ससून रुग्णालयात गर्दी मोठ्या प्रमाणावर असते. अनेकदा मारहाणीचे प्रकार घडतात. या सर्व पार्श्वभूमीवर बोलताना आयुक्त म्हणाले, डॉक्टर, रुग्ण, तसेच त्यांच्या नातेवाइकांची सुरक्षितता अबाधित राहावी, यासाठी ही चौकी उपयुक्त ठरणार आहे. चौकीमध्ये लवकरच पोलीस निरीक्षक दर्जाचा अधिकारी व कर्मचारी नियुक्त केले जातील. परिसरात शिस्तीचे वातावरण निर्माण करण्यासाठी त्यांची भूमिका निर्णायक असेल.