आदिवासी नागरिकांसह सामान्य जनतेसाठी सुविधा

पुणे – जिल्ह्यातील खेड, आंबेगाव, जुन्नर या आदिवासीबहुल तालुक्‍यांसाठी मध्यवर्ती असणाऱ्या मंचर उपजिल्हा रुग्णालयाचे 100 वरुन 200 बेडचे होणार आहे. या प्रस्तावास उपमुख्यमंत्री अजित पवार यांनी मंगळवारी तत्वत: मान्यता दिली. या उपजिल्हा रुग्णालयातील बेडची संख्या वाढल्याने आदिवासी बांधवांसह या भागातील सामान्य जनतेची मोठी सोय होणार आहे.

मंत्रालयातील उपमुख्यमंत्री कार्यालय येथे आंबेगाव तालुक्‍यातील मंचर येथील उप जिल्हा रुग्णालयाच्या खाटांच्या श्रेणी वाढीबाबत पवार यांच्या अध्यक्षतेखाली बैठकीचे आयोजन करण्यात आले होते.

यावेळी गृहमंत्री दिलीप वळसे-पाटील, आरोग्यमंत्री राजेश टोपे, आरोग्य राज्यमंत्री राजेंद्र पाटील-यड्रावकर, नियोजन विभागाचे अप्पर मुख्य सचिव देबाशिष चक्रवर्ती, आरोग्य विभागाचे प्रधान सचिव प्रदीप व्यास उपस्थित होते. पुणे जिल्ह्यातील खेड, आंबेगाव, जुन्नर तालुके हे आदिवासी बहुल आणि दुर्गम तालुके आहेत. या तिन्ही तालुक्‍यातून पुणे जिल्हा मुख्यालयाचे ठिकाण दूर आहे.

याचा विचार करुन या तिन्ही तालुक्‍यांसाठी मध्यवर्ती ठिकाण असणाऱ्या मंचर,(ता.आंबेगाव) येथील उपजिल्हा रुग्णालयाचे शंभर खाटांवरून दोनशे बेड श्रेणीवर्धन प्रस्तावाला उपमुख्यमंत्री पवार यांनी तत्वत: मान्यता दिली.