Pune Land Scam: मुंढवा येथील शासकीय जमीन गैरव्यवहार प्रकरणात अमेडिया एंटरप्राइझेस कंपनीचे भागीदार दिग्विजय पाटील यांनी मुद्रांक जिल्हाधिकारी यांच्याकडे अभिनिर्णयासाठी (ॲडज्युडिकेशन) केलेल्या अर्जावर शीतल तेजवानीच्या सांगण्यावरून ऑफीसबॉयने सही केल्याचे तपासात निष्पन्न झाले आहे. चंद्रकांत विठ्ठल तिखे असे या ऑफीसबॉयचे नाव आहे. तर तत्कालीन सह दुय्यम निबंधक रवींद्र तारू याने जाणीवपूर्वक दुर्लक्ष करून या प्रकरणातील दस्ताची नोंदणी करून घेतली आहे. याप्रकरणी शीतल किशनचंद तेजवानीसह दिग्विजय पाटील आणि तारू यांच्याविरोधात बावधन पोलिसांत गुन्हा दाखल आहे. या गुन्ह्यात न्यायालयीन कोठडीत असलेल्या तेजवानी आणि तारू यांनी जामीन मिळण्यासाठी केलेला अर्ज अतिरिक्त सत्र न्यायाधीश डी. पी. रागीट यांनी फेटाळला. यापूर्वी दोघांचाही अर्ज प्रथमवर्ग न्यायदंडाधिकारी न्यायालयाने फेटाळून लावला आहे. जामीन अर्जास प्रमुख जिल्हा सरकारी वकील प्रमोद बोंबटकर यांनी विरोध केला. मुंढवा येथील जमीन राज्य शासनाच्या मालकीचे असल्याचे स्पष्टपणे माहिती असताना, तसेच त्याबाबत विविध ठिकाणी शासकीय विभागाकडून जमीन शासनाच्या मालकीची असल्याचे आदेश झाले आहेत, अशी माहिती असतानाही त्या मिळकतीचे तेजवानीने जाणीवपूर्वक दस्त नोंदवले व शासनाची फसवणूक केली. तर तारू याने ४० एकर जागेचे एकूण २१ कोटी रुपये मुद्रांक शुल्क भरून घेणे अपेक्षित असताना फक्त ५०० रुपयांचे मुद्रांक शुल्क भरून घेऊन एकूण २० कोटी ९९ लाख ९९ हजार ५०० रुपयांची इतर आरोपींच्या मदतीने शासनाची फसवणूक केली आहे. त्यामुळे दोघांचा जामीन फेटाळण्याची मागणी ॲड. बोंबटकर यांनी केला. Pune News : थकबाकीचे बिलच चुकीचे? महापालिकेची पाण्याच्या थकबाकी वसुलीबाबत भूमिका
