Shital Tejvani : राज्याचे उपमुख्यमंत्री अजित पवार यांचे थोरले सुपुत्र पार्थ पवार यांच्याशी निगडित पुण्यातील मुंढवा जमीन प्रकरण प्रचंड गाजले. या जमीन प्रकरणात अनेक धक्कादायक माहिती समोर येत गेली. पार्थ यांच्या अमेडिया कंपनीचे नाव समोर आले होते. त्यानंतर राज्यभरात एकच खळबळ उडाली होती. या प्रकरणातील फरार आरोप शीतल तेजवानी हिने परदेशात पलायन केल्याची चर्चा होती. अखेर तिला काल ३ डिसेंबर रोजी पोलिसांनी बेड्या ठोकल्या आहेत. शीतल तेजवानीची पोलिसांकडून कसून चौकशी केली जात असून, पार्थ पवार यांच्या अडचणी यामुळे अधिक वाढणार असल्याचे बोलले जात आहे. पुण्यातील जमीन गैरव्यवहार प्रकरणाचा सखोल तपासात शीतल तेजवानीचा थेट सहभाग असल्याचे स्पष्ट झाल्याने काल ३ डिसेंबर तिच्यावर अटकेची कारवाई करण्यात आली आहे. आज ४ डिसेंबर रोजी शीतल यांना कोर्टात हजर करण्यात येणार आहे. त्यामुळे जमीन गैरव्यवहार प्रकरणात कोर्टात काय घडते? हे पाहणे महत्वाचे असणार असून, या प्रकरणात आणखी धक्कादायक माहिती समोर येऊ शकतो अशी शक्यता वर्तवली जात आहे. शीतल तेजवाणीवर आरोप काय आहे? शासनाचे कोणतेही आदेश नसताना जमिनीचे मूळ वतनदार आणि वारसदार त्यांच्याकडून कागदपत्र तयार करून जमीन विक्री केल्याप्रकरणी फसवणूकीचा आरोप असून त्यामुळे अटक करण्यात आली आहे. त्यानुसार शीतल तेजवानी विरोधात खडक पोलिस ठाण्यात गुन्हा दाखल झाला आहे. जमीन गैरव्यवहार प्रकरणाचा तपास पुणे गुन्हे शाखेच्या वतीने केला जात आहे. तेजवानी पती पत्नीचे काळे कारनामे उघड शीतल तेजवाणी ही रिअल इस्टेट डेव्हलपमेंटमध्ये सक्रिय आहे. तिचा पती सागर सूर्यवंशी हा सेवा विकास सहकारी बँक घोटाळा प्रकरणातील आरोपी आहे, ज्यावर प्रवर्तन संचालनालय (ED) ने चौकशी केली होती. त्यांनी मोठ्या प्रमाणात कर्जे घेतली आहेत, ज्यात १६ कोटी ४८ लाखांचे कॅश क्रेडिट कर्ज आणि १० कोटींचे इतर कर्ज समाविष्ट आहे. सागर सुर्यवंशीने शीतल तेजवानीसह कुटुंबियांच्या नावे 10 कर्जे घेतली. ही कर्ज घेताना बनावट कागपत्र सादर करण्यात आली होती. घेतलेली कर्जे फेडली नसल्याने जानेवारी 2023 मध्ये ईडीकडून सागर सूर्यवंशीच्या घर आणि कार्यालयावर छापा टाकण्यात आला. सागर सूर्यवंशीच्या 45 कोटींच्या मालमत्ता जप्त करण्यात आली होती, मे 2023 मध्ये स्पेशल कोर्टात खटला दाखल करण्यात आला. २०२१ मध्ये सागर सुर्यवंशीला ऑक्टोबर 2021 मध्ये आधी सीआयडीने आणि नंतर पिंपरी चिंचवड पोलिसांनी अटक केली होती. जामिनावर बाहेर येताच सागर सूर्यवंशीला जून 2023 मध्ये ईडीकडून अटक केली होती, अशी धक्कादायक माहिती चौकशीत समोर आली आहे. त्यामुळे तेजवानी पती पत्नीचे काळे कारनामे उघड झाले आहेत. नेमकं प्रकरण काय? काही दिवसांपूर्वी पुण्यातील मुंढवा जमीन गैरव्यवहार झाल्याचे उजेडात आले. या जमीन गैरव्यवहार प्रकरणात उपमुख्यमंत्री अजित पवार यांचे पुत्र पार्थ पवार यांच्या अमेडिया कंपनीचे नाव समोर आले होते. त्यांच्या कंंपनीने या जमीनीचा बाजारभाव १८०० कोटी असताना ही जमीन अवघ्या ३०० कोटी रुपयांमध्ये खरेदी केली होती. अमेडिया कंपनीने ही जमीन पॅरामाउंट कंपनीची संचालक शीतल तेजवानीकडून खरेदी केली होती. पार्थ पवारांची अडचण वाढणार जमीन गैरव्यवहार प्रकरणातील मुख्य सूत्रधार शीतल तेजवानीला अटक करण्यात आली असून, पार्थ पवार हे अमेडिया कंपनीचे मुख्य प्रवर्तक आहेत. तसेच जमीन खरेदी प्रकरणातील इरादापत्रावर त्यांची सही देखील आहे. त्यामुळे त्यांच्या अडचणी वाढल्या आहेत. हेही वाचा : Satara: सातारा जिल्ह्यात पालिका निवडणुकांसाठी 66.59 टक्के मतदान
