Pune: नोबेल शांतता पुरस्कार विजेते कैलास सत्यार्थी यांना यंदाचा मानाचा ‘लता दीनानाथ मंगेशकर पुरस्कार 2026’ जाहीर झाला आहे. पद्मश्री पं. हृदयनाथ मंगेशकर यांनी ही घोषणा केली असून मास्टर दीनानाथ मंगेशकर यांच्या ८४ व्या पुण्यतिथीचे औचित्य साधून हा सोहळा पार पडणार आहे. मास्टर दीनानाथ मंगेशकर स्मृती प्रतिष्ठान आणि हृदयेश आर्ट्स तर्फे सकाळ माध्यम समूहाच्या सहकार्याने आयोजित केला जाणारा हा कार्यक्रम देशातील एक अत्यंत प्रतिष्ठित सांस्कृतिक उपक्रम मानला जातो. कला, साहित्य आणि समाजसेवा या क्षेत्रांत अष्टपैलू योगदान देणाऱ्या व्यक्तिमत्त्वांना सन्मानित करण्याची परंपरा या निमित्ताने यंदाही जपली जाणार आहे. विविध क्षेत्रांतील नामवंतांचा समावेश – या वर्षाच्या पुरस्कार विजेत्यांमध्ये विविध क्षेत्रांतील नामवंतांचा समावेश आहे. संगीत क्षेत्रातील योगदानासाठी महेश काळे आणि नृत्य क्षेत्रासाठी शमा भाटे यांना गौरवण्यात येणार आहे. रंगमंच आणि चित्रपट विभागातून सुबोध भावे यांना, तर सिनेमा क्षेत्रासाठी रवीना टंडन आणि प्राजक्ता माळी यांना हा सन्मान प्रदान केला जाईल. पत्रकारितेतील योगदानासाठी सुशील कुलकर्णी, साहित्यासाठी अच्युत गोडबोले आणि विशेष पुरस्कारासाठी डॉ. धनंजय केळकर यांची निवड करण्यात आली आहे. समाजसेवेच्या गटात ठाण्यातील वसुंधरा संजीवनी मंडळाचे आनंद भागवत यांचा सत्कार होईल. तसेच ‘मोहन वाघ पुरस्कार’ यंदा जिगीषा अष्टविनायक निर्मित ‘भूमिका’ या नाटकाला देण्यात येणार असून, मुख्य अभिनेता सचिन खेडेकर यांच्यासह निर्माते दिलीप जाधव आणि श्रीपाद पद्माकर यांनाही सन्मानित केले जाईल. या सोहळ्याचे प्रमुख आकर्षण असलेल्या ‘लता दीनानाथ मंगेशकर पुरस्काराचे’ हे पाचवे वर्ष आहे. कैलास सत्यार्थी यांनी मुलांच्या अधिकारांसाठी आणि सामाजिक न्यायासाठी केलेल्या अतुलनीय कार्याचा गौरव या पुरस्काराच्या माध्यमातून केला जाणार आहे. एमआयटी वर्ल्ड पीस युनिव्हर्सिटीचे संस्थापक-अध्यक्ष डॉ. विश्वनाथ कराड हे या कार्यक्रमाला मुख्य अतिथी म्हणून उपस्थित राहणार आहेत. विज्ञान, अध्यात्म आणि मूल्याधिष्ठित शिक्षणाचा प्रसार करणारे व्यक्तिमत्त्व म्हणून त्यांच्या उपस्थितीला विशेष महत्त्व आहे. ‘मी लता दीनानाथ…’ विशेष सांगीतिक मैफल – सांस्कृतिक कार्यक्रमाची मेजवानी म्हणून पं. हृदयनाथ मंगेशकर स्वतः ‘मी लता दीनानाथ…’ ही विशेष सांगीतिक मैफल सादर करणार आहेत. यामध्ये लता मंगेशकर यांच्या अजरामर गीतांचा प्रवास उलगडला जाईल. या मैफलीत विभावरी जोशी, मधुरा दातार, सावनी रविंद्र, श्रेयसी पावगी, मनीषा निश्चल, ऋतुजा तारे आणि डॉ. उन्मेष करमरकर हे कलाकार गायन सादर करतील. मिलिंद कुलकर्णी या कार्यक्रमाचे सूत्रसंचालन करतील, तर सुप्रिया चिटणीस सुत्रसंचालक म्हणून जबाबदारी सांभाळतील. हा भव्य सोहळा शुक्रवार, २४ एप्रिल २०२६ रोजी सायंकाळी ५:०० ते रात्री १०:०० या वेळेत गणेश कला क्रीडा मंदिर, स्वारगेट, पुणे येथे संपन्न होणार आहे.
