पुणे :  पत्नीला दरमहा अंतरिम पोटगी देण्याचा आदेश न्यायालयाने पतीला दिला होता. मात्र, पतीने पोटगीची रक्कम दिलीच नाही. तिने प्रलंबित पोटगीसाठी न्यायालयात पुन्हा अर्ज केला. त्यानुसार न्यायालयाने पतीविरुद्ध अटक वॉरन्ट जारी केल्यांनतर पोलिसांनी पतीला न्यायालयात हजर केले.

मात्र, पोटगीची १४ लाख रुपयांची थकीत रक्कम भरण्यास पतीने नकार दिल्याने प्रथमवर्ग न्याय दंडाधिकारी व्ही. एस. खंदारे यांनी पतीला एक महिन्याच्या साधा कारावासाची शिक्षा सुनावली.
पतीने पोटगीचे किमान १ लाख ६२ हजार रुपये भरली, तरच त्याची सुटका केली जाईल, असेही आदेशात नमूद केले आहे. ऍड. जयपाल पाटील आणि ऍड. सुखदेव सानप यांनी न्यायालयात पत्नीची बाजू मांडली.

स्मिता आणि राकेश (नावे बदललेली) यांचे लग्न १७ जानेवारी २०१३ मध्ये झाले. दोघांना एक मुलगी आहे. माहेरहून हुंडा आणला नाही म्हणून पतीने तिचा शारीरिक व मानसिक छळ करण्याबरोबरच जीवे मारण्याचा प्रयत्नही केला होता. त्यामुळे स्मिता राकेशपासून वेगळी राहू लागली. स्मिताने कौटुंबिक हिंसाचाराअंतर्गत न्यायालयात अर्ज दाखल करून पोटगीची मागणी केली. त्यानुसार २०२२ मध्ये न्यायालयाने पत्नीला २७ हजार रुपये अंतरिम पोटगी मंजूर केली.

तरीही पतीने तिला पोटगीची रक्कम दिली नाही. या निर्णयाविरुद्ध पतीच्या वकिलांनी अपील दाखल केल्याचे न्यायालयात सांगितले. मात्र, असे कोणतेही अपील केल्याचे आढळले नाही. पोटगीची थकीत रक्कम १४ लाखांच्या घरात पोहोचल्यामुळे पत्नीने रक्कम मिळण्यासाठी न्यायालयात अर्ज दाखल केला होता.