Pune : श्री. पुना गुजराती बंधू समाजातर्फे कोंढव्यातील जयराज स्पोर्ट्स अँड कन्व्हेन्शन सेंटरच्या अनायास लॉनवर आयोजित ‘दिवाळी पहाट’ कार्यक्रम उत्साहात पार पडला. पहाटे ५.३० वाजता सुरू झालेल्या या संगीत कार्यक्रमाला दोन हजारांहून अधिक रसिक उपस्थित होते. नीलकंठ ज्वेलर्सने कार्यक्रमाला प्रायोजकत्व दिले होते.

संस्थेचे अध्यक्ष जयंत शहा, व्यवस्थापकीय संचालक राजेश शहा, उपव्यवस्थापकीय संचालक नैनेश नंदू, उपाध्यक्ष वल्लभभाई पटेल, विश्वस्त आणि दानदात्यांच्या हस्ते दीपप्रज्वलन करून कार्यक्रमाची सुरुवात झाली. राजेश शहा यांनी उपस्थितांचे स्वागत केले. कार्यक्रमाचे आयोजन विश्वस्त दिलीप मेहता यांनी केले होते.

आंतरराष्ट्रीय विक्रमांची नोंद असलेले गायक विवेक पांडे आणि त्यांच्या सहकाऱ्यांनी हिंदी व मराठीतील लोकप्रिय गाणी सादर केली. संतूर, बासरी, सॅक्सोफोन, गिटार, की-बोर्ड, ढोलक, तबला यांसह विविध वाद्यांची सुरेल साथ या सादरीकरणाला लाभली. गाण्यांना रसिकांनी टाळ्यांच्या गजरात दाद दिली. प्राजक्ता जोगळेकर यांनी कार्यक्रमाचे सूत्रसंचालन केले.

कार्यक्रमात फ्लॅमिंगो टूर्सतर्फे लकी ड्रॉचे आयोजन करण्यात आले होते. त्यातून उपस्थितांना आकर्षक बक्षिसे देण्यात आली. संगीताच्या कार्यक्रमानंतर उपस्थितांनी अल्पोपहार आणि दिवाळी फराळाचा आस्वाद घेतला.

यावेळी संस्थेचे कोषाध्यक्ष सी.ए. हरेश शाह, सचिव राजेंद्र शाह यांच्यासह मोहन गुजराती, जनक शाह, हंसा शहा, हिना शहा, पंकज कपाडिया, पंकज देडिया, विनोद देडिया, दीपक मेहता, अनुज गांधी, वृजेश शहा, केतन कपाडिया, हेमंत मेहता, संदीप शहा, क्रिती नागरेचा, सत्येन पटेल, बृजेन शाह उपस्थित होते. तसेच फ्लॅमिंगो टूर्सचे शलाक शहा, युवराज शहा, विविध संस्थांचे पदाधिकारी आणि समाजबांधव मोठ्या संख्येने सहभागी झाले. संगीत, आनंद आणि उत्साहाच्या वातावरणात पार पडलेल्या या कार्यक्रमाने पुणेकरांच्या दिवाळीचा आनंद द्विगुणित केला.