नसरापूर : पुणे जिल्हा यंदा आंतरराष्ट्रीय क्रीडा नकाशावर झळकावणाऱ्या Pune Grand Challenge Tour 2025 सायकल स्पर्धेसाठी सज्ज होत आहे. डोंगरकुशीतून, गड-किल्ल्यांच्या पायथ्याशी, तलावांच्या काठाने जाणारा निसर्गरम्य ट्रॅक जगभरातील खेळाडूंना मोहिनी घालणार आहे. मात्र याच आधी परदेशी खेळाडू स्पर्धेच्या मार्गाची पाहणीसाठी आल्यावर पुणे–सातारा महामार्गाची खड्डेमय अवस्था पाहून मनाची कुचंबणा होईल, अशी भीती व्यक्त केली जाते.

हजारो कोटींचा निधी – ग्रामीण भागाला चालना

स्पर्धेच्या निमित्ताने भोर व पुरंदर विधानसभेत रस्त्यांचे सात मीटर (किंवा शक्य नसेल तिथे साडेपाच मीटर) रुंदीकरण, दर्जेदार डांबरीकरण, दिशादर्शक फलक, पर्यटन सुविधा, रोजगार निर्मिती आदी कामांसाठी तब्बल हजारो कोटी रुपयांचा निधी उपलब्ध होणार आहे. भोरला 121 कोटी, तर पुरंदर–हवेलीला 114 कोटी अशा प्राथमिक टप्प्यातील मंजुरी झाली आहे. शासनस्तरावर ग्रामीण पर्यटन व आर्थिक संधींना गती देण्याचा उद्देश स्पष्ट दिसतो.

स्पर्धेचा ट्रॅक – चार टप्प्यांत 400 पेक्षा अधिक किमी

या आंतरराष्ट्रीय दर्जाच्या स्पर्धेत 50 देशांचे सायकलपटू सहभागी होणार असून ट्रॅक चार टप्प्यांत पुणे जिल्ह्याच्या विविध भागातून जाणार आहे.

स्टेज 1: श्री शिवछत्रपती क्रीडा संकुल, बालेवाडी – शनिवार वाडा – बालगंधर्व रंगमंदिर (99.15 किमी)

स्टेज 2: TCS सर्कल, हिंजवडी – हादशी लेक – पौड – डी. वाय. पाटील आंतरराष्ट्रीय संस्था, आकुर्डी (91.8 किमी)

स्टेज 3: द लेडीज क्लब, कॅम्प – नारायणपूर – सिंहगड घाट – खडकवासला – नांदेड सिटी (109.15 किमी)

स्टेज 4: चंदन टेकडी, सासवड – सुपे – मोरगाव – बारामती (137.07 किमी)

एकूण चार स्टेजेसमधून भोर, राजगड, मुळशी, मावळ, पुरंदर व बारामती या तालुक्यांतील निसर्गरम्य रस्ते जागतिक दर्जाचे रूप घेतील. किल्ल्यांच्या पार्श्वभूमीवर, तलावांच्या किनाऱ्याने सायकल चालवण्याचा अनुभव खेळाडूंना पर्वतीय भारताची झलक देणार आहे.

महामार्गाची दयनीय अवस्था

या सर्व नियोजनाच्या दरम्यान पुणे–सातारा महामार्गाची विद्यमान स्थिती चिंतेचा विषय ठरली आहे. खोल खड्डे, उखडलेले डांबर, असमान पॅच, वाहतुकीची सततची कोंडी – या समस्या स्थानिक वाहनचालकांसाठी दैनंदिन वास्तव झाल्या आहेत. याच महामार्गावरून आंतरराष्ट्रीय पाहुणे प्रथम आगमन करतील, त्यामुळे प्रथमदर्शनी जिल्ह्याची प्रतिमा मलिन होण्याची शक्यता आहे.

स्थानिक ग्रामस्थ व सामाजिक संघटनांचे मत 

“ट्रॅक कितीही सुंदर, दर्जेदार असला तरी पहिला अनुभव महामार्गावरूनच होतो. खड्डेमय रस्ता पाहून खेळाडू व आयोजनकर्त्यांच्या मनात नकारात्मक छाप पडेल. शासनाने स्पर्धेपूर्वी महामार्गाचे तातडीने गुळगुळीत डांबरीकरण करणे गरजेचे आहे.”

पत्रकार परिषदेत विकास आराखडा

या स्पर्धा व विकासकामांबाबत आयोजित पत्रकार परिषदेत भाजप नेते माजी आमदार संग्राम थोपटे, आमदार संजय जगताप, बाळासाहेब गरुड, संतोष धावले, संदीप कटके, जीवन कोंडे आदी मान्यवर उपस्थित होते. या परिषदेत भोर–पुरंदर परिसरातील रस्ता विकास, ट्रॅकचे नियोजन, पर्यटनास चालना आणि रोजगाराच्या संधी याबाबत सविस्तर माहिती देण्यात आली. अधिकाऱ्यांनी स्पर्धेची रूपरेषा मांडताना जिल्ह्याच्या आर्थिक व सामाजिक विकासासाठी हा टप्पा महत्त्वाचा असल्याचे स्पष्ट केले.

ग्रामीण पर्यटन व रोजगाराचा नवा अध्याय

या स्पर्धेमुळे ग्रामीण भागात रोजगार निर्मिती, लघुउद्योगांना चालना, होमस्टे व हॉटेल व्यवसायाला संधी, कृषी-पर्यटनाचा विकास यांची दारे उघडतील. भोर–राजगड परिसरातील ऐतिहासिक किल्ले, धरणे व निसर्गसंपदा जागतिक स्तरावर प्रकाशझोतात येतील. परदेशी खेळाडू व पर्यटकांसाठी ग्रामीण महाराष्ट्राचा अनुभव नवे आर्थिक मार्ग खुला करू शकतो.

Pune Grand Challenge Tour 2025 ही स्पर्धा पुणे जिल्ह्याला आंतरराष्ट्रीय व्यासपीठ देणार, ग्रामीण भागाला पर्यटन व अर्थकारणाची नवी दिशा देणार आहे. परंतु महामार्ग दुरुस्तीला तितकेच प्राधान्य न दिल्यास जागतिक स्तरावर पहिली छाप नकारात्मक ठरू शकते. शासनाने रस्त्यांच्या गुणवत्तेला तातडीने हात घालून खेळाडूंच्या स्वागताला साजेशी पायाभूत सुविधा निर्माण केल्यास जिल्हा खऱ्या अर्थाने जागतिक क्रीडा केंद्र ठरू शकतो.

“ही स्पर्धा चार फेजमध्ये होणार आहे. यामध्ये भोर, राजगड, मुळशी, मावळ, पुरंदर व बारामती या तालुक्यांतील रस्ते रुंदीकरण सात मीटर तर शक्य नसेल तिथे साडेपाच मीटरचे चांगल्या दर्जाचे रस्ते तयार करण्यासाठी या परिसरातील शासनस्तरावरील सुधारणा व रोजगारासाठी हजारो कोटी रुपयांचा निधी उपलब्ध होणार आहे.”

– संग्राम थोपटे माजी आमदार