शिक्रापूर : शिरुर शहरामध्ये बेकायदेशीरपणे मांडूळ जातीचा साप घेऊन फिरणाऱ्या दोघांना शिरुर पोलिसांच्या पथकाने अटक करत मांडूळ साप जप्त करुन वनविभागाच्या ताब्यात दिले आहे. देवदास ईमराज भोसले व धनेश्वर दुर्यभान भोसले असे पोलिसांनी अटक केलेल्या दोघांची नावे आहे.

शिरुर पोलीस स्टेशनचे पोलीस उपनिरीक्षक शुभम चव्हाण, पोलीस हवालदार विजय शिंदे, सचिन भोई, नितेश थोरात, अजय पाटील, निरज पिसाळ हे शहारामध्ये गस्त घालत असताना दोन युवक रामलींग रोडलगत पांढऱ्या रंगाच्या स्विफ्ट कार मध्ये बेकायादेशीपणे मांडूळ प्रजातीचा साप घेऊन थांबले असल्याची माहिती मिळाली होती.

त्यांनतर पोलिसांनी सदर ठिकाणी जात संशयित असलेल्या स्विफ्ट कारची पाहणी केली असता त्या कारमध्ये दोन युवक मांडूळ साप घेऊन बसल्याचे दिसून आले. दरम्यान पोलिसांनी त्यांना ताब्यात घेत त्यांच्या जवळील मांडूळ साप जप्त केला.

पोलिसांनी देवदास ईमराज भोसले वय ५१ वर्ष रा. मुखई ता. शिरूर जि. पुणे व धनेश्वर दुर्यभान भोसले वय ३५ वर्ष, रा. गणेगाव खालसा ता. शिरूर जि. पुणे या दोघांवर वन्यजीव संरक्षण अधिनियम कलमानुसार गुन्हा दाखल केला.

याबाबतची माहिती शिरुर वनविभागाचे वनपरीमंडळ अधिकारी गणेश पवार यांना देत जप्त केलेला मांडूळ साप त्यांच्या ताब्यात देण्यात आला असून पुढील तपास पोलीस निरीक्षक संदेश केंजळे यांच्या मार्गदर्शनाखाली पोलीस उपनिरीक्षक शुभम चव्हाण हे करत आहे.