pune ganpati : लाडक्या बाप्पांचा निरोप घेण्याचा वेळ जवळ आली असताना गणेशोत्सवाच्या अखेरच्या दिवशीही शहरातील महत्त्वाच्या आणि मानाच्या गणपतींच्या दर्शनासाठी भाविकांची गर्दी कायम राहिली.

शुक्रवारी अनंत चतुर्दशीला गणेश विसर्जन मिरवणूक निघणार असल्याने बाप्पांचे दर्शन घेण्याची, तसेच उभारलेले आकर्षक देखावे पाहण्याची शेवटची संधी असल्याने शहरातील गणेश मंडळांच्या समोर गर्दी वाढली होती.

गणेशोत्सवाच्या कालावधीत शहरातील विविध मंडळांनी उभारलेले देखावे पाहण्यासाठी मोठ्या संख्येने भाविक मध्यवर्ती पुण्यात दाखल झाले. शुक्रवारी विसर्जन मिरवणुकीच्या पार्श्वभूमीवर सर्व मंडळांचे गणपती विसर्जनासाठी मार्गस्थ होणार आहेत.

काही मंडळांनी त्याची तयारी केली असून, मिरवणुकीच्या रांगेत लागायलाही सुरुवात केली आहे. त्यामुळे गुरुवारी सकाळपासूनच भाविकांनी मानाच्या गणपतींच्या दर्शनासाठी, तसेच देखावे पाहण्यासाठी गर्दी केली.

शहराच्या मध्यवर्ती भागातील प्रमुख गणेश मंडळांच्या परिसरात दिवसभर भाविकांची वर्दळ होती. कुटुंबांसह दर्शनासाठी आलेल्या नागरिकांबरोबरच बाहेरगावाहून आलेल्या भाविकांची संख्याही लक्षणीय होती. रात्री उशिरापर्यंत दर्शन आणि देखावे पाहण्यासाठी गर्दी कायम राहिली.

शुक्रवारी अनंत चतुर्दशीला विसर्जन मिरवणुकीस सुरुवात होणार असल्याने त्यानंतर मांडवातील गणरायाचे दर्शन आणि देखावे पाहण्याची संधी पुन्हा वर्षभर उपलब्ध होणार नसल्याने शेवटच्या दिवशी भाविक गर्दी करताना दिसले.