Pune Election Results – जिल्हा परिषद व पंचायत समितीच्या निवडणुकीत लोणी काळभोर जिल्हा परिषद गट व कदमवाकवस्ती पंचायत समिती गणात राष्ट्रवादी काँग्रेसने विजयाचा झेंडा फडकवला असून लोणी काळभोर गणात अपक्ष उमेदवाराने बाजी मारली आहे. लोणी काळभोर मतदारसंघातील मतदारांनी भाजपचा सुपडासाफ केल्याचे निकालातून स्पष्ट झाले आहे. लोणी काळभोर जिल्हा परिषद गटात राष्ट्रवादी काँग्रेसच्या उमेदवार शीतल सुजीत कांबळे यांनी 15,529 मते मिळवत नजिकच्या प्रतिस्पर्धी भाजपच्या पूनम बाबुराव गायकवाड यांचा 4,810 मतांनी पराभव केला. कदमवाकवस्ती पंचायत समिती गणात राष्ट्रवादी काँग्रेसचे अमोल त्रिंबक टेकाळे यांनी 6,892 मते मिळवत भाजपचे ज्ञानेश्वर नामुगडे यांचा 220 मतांनी पराभव केला. तर लोणी काळभोर पंचायत समिती गणात अपक्ष उमेदवार विद्या दत्तात्रय गायकवाड यांनी 5,570 मते मिळवत राष्ट्रवादी काँग्रेसच्या रेश्मा काळभोर यांचा 128 मतांनी पराभव करत विजय मिळवला.लोणी काळभोर गणातील राष्ट्रवादी काँग्रेसच्या उमेदवार रेश्मा काळभोर यांना 128 मतांनी पराभव स्वीकारावा लागला. या गणातील लोणी काळभोर गावात मतदानाची टक्केवारी अपेक्षेपेक्षा कमी झाल्याने त्यांना फटका बसल्याची चर्चा आहे. तसेच एकाच गावातील तीन उमेदवार असल्याने निकालावर त्याचा परिणाम झाल्याचेही बोलले जात आहे.लोणी काळभोर जिल्हा परिषद गटात एकूण 51,336 मतदार असून त्यापैकी 29,487 मतदारांनी मतदानाचा हक्क बजावला. लोणी काळभोर पंचायत समिती गणात 24,859 मतदारांपैकी 14,975 मतदारांनी मतदान केले. कदमवाकवस्ती गणात 26,477 मतदारांपैकी 13,047 मतदारांनी मतदानाचा हक्क बजावला. कदमवाकवस्ती गणात 27 तर लोणी काळभोर गणात 22 मतदान केंद्रांवर मतदान प्रक्रिया पार पडली. या निवडणुकीत भाजपला एकाही जागेवर यश मिळवता आले नाही. केंद्र व राज्यात सत्ता, मोठे नेते, जोरदार प्रचार आणि शक्तीप्रदर्शन असूनही मतदारांनी भाजपला साफ नकार दिला. परिणामी लोणी काळभोर परिसरात भाजप पूर्णतः भुईसपाट झाल्याचे चित्र दिसून आले. विजयानंतर शीतल कांबळे, अमोल टेकाळे आणि विद्या गायकवाड यांनी मतदारांचे आभार मानत परिसराच्या सर्वांगीण विकासासाठी एकजुटीने काम करण्याचा निर्धार व्यक्त केला.
