खासदार सुप्रिया सुळे यांचे केंद्रीय मंत्री नितीन गडकरी यांना निवेदन

जळोची – बारामती लोकसभा मतदारसंघातून जाणारे विविध राष्ट्रीय महामार्ग आणि त्यांवरील प्रलंबित तसेच सुरू असलेली कामे लवकरात लवकर पूर्ण करावीत, अशी मागणी खासदार सुप्रिया सुळे यांनी केंद्रीय रस्ते व महामार्ग मंत्री नितीन गडकरी यांच्याकडे केली आहे.

दिल्ली येथे गडकरी यांची भेट घेऊन सुळे यांनी या मागण्यांबाबत सविस्तर चर्चा करून निवेदन दिले. यात पालखी मार्गावरील नीरा जंक्‍शन आणि लोणंद सातारा रस्ता हे राष्ट्रीय महामार्ग म्हणून घोषित करणे, पुणे-सोलापूर रस्त्यावर इंदापूर तालुक्‍यातील भिगवण येथे भुयारी मार्ग तयार करणे तसेच लोणी काळभोर, उरुळी कांचन, यवत, वरवंड, पाटस आदी गावांतील नागरिकांना रस्ता ओलांडण्यासाठी आवश्‍यक त्या सुरक्षेच्या उपाययोजना करणे ही कामे तातडीने पूर्ण करण्याची गरज असल्याचे सुळे यांनी आपल्या निवेदनात म्हटले आहे.

सोलापूर राष्ट्रीय महामार्गावर दौंड तालुक्‍यात वरवंड विभागात भुयारी मार्ग आणि सहजपूर येथे उड्डाणपूल उभारणे अत्यावश्‍यक असून याबाबत स्थानिक नागरिक सातत्याने मागणी करत आहेत. ही बाब आपण यापूर्वीही लक्षात आणून दिल्याचे पत्रात म्हटले आहे. पुरंदर तालुक्‍यात सासवड रस्त्यावर हडपसर ते दिवे घाट या पालखी महामार्गाचे रुंदीकरण, भोर तालुक्‍यात करंदी-कांबरे आणि भाटघर धरणाकडे राजगड वेळवंड खोऱ्यातून जाणाऱ्या राज्य रस्त्यावर पूल उभारणी करण्याची मागणीही त्यांनी केली आहे.

मुळशी तालुक्‍यातील भुगाव आणि घोटावडे फाटा येथे उड्डाणपूल उभारणी करण्याबाबत त्यांनी निवेदनात उल्लेख केला आहे. हवेली तालुक्‍याच्या शहरी भागात येणाऱ्या खडकवासला मतदारसंघात मुंबई-बंगळूरु बाह्यवळण महामार्गाला संलग्न असा वडगाव बुद्रुक येथील उड्डाण पुलापासून वारजेपर्यंत मुठा नदीवर 12 मीटर रुंदीचा पूल उभारणी करण्याची मागणीही त्यांनी केली आहे.

मढे घाटमार्गे महाडमध्ये…
वेल्हे तालुक्‍यातील अत्यंत महत्त्वाचा मढेघाट मार्गे महाडमध्ये जाणारा रस्ता राष्ट्रीय महामार्ग म्हणून घोषित करण्याबाबत खासदार सुळे यांनी पुन्हा एकदा आठवण करून देत निधीचीही मागणी केली आहे.