पुणे, – पुणे-दिल्ली-पुणे प्रवास करणाऱ्यांची संख्या अधिक आहे. त्यामुळे या प्रवाशांना आरामदायी आणि तत्काळ सुविधा उपलब्ध व्हावी, यासाठी पुणे-दिल्ली वंदे भारत स्लीपर ट्रेन सुरू व्हावी, अशी मागणी पुण्याचे खासदार व केंद्रीय राज्यमंत्री मुरलीधर मोहोळ यांनी रेल्वे मंत्री अश्विनी वैष्णव यांची दिल्ली येथे भेट घेऊन केली.

यावेळी मोहोळ यांनी पुणे संबंधित विविध विषयांसंदर्भात अश्विनी वैष्णव यांच्याशी सविस्तर चर्चा केली. त्यामध्ये प्रामुख्याने पुणे-दिल्ली वंदे भारत स्लीपर ट्रेन सुरू करण्याबरोबरच ⁠पुणे-सोलापूर, पुणे-नाशिक, पुणे-कोल्हापूर दरम्यान वंदे भारत सुरू व्हावी, अशी मागणी केली. तसेच ⁠पुणे ते जोधपूर (राजस्थान) दरम्यान सुरू असलेल्या रेल्वे फेऱ्यांची संख्या वाढविण्यात यावी. जेणेकरून प्रवाशांना त्याचा फायदा होईल, अशाही मागण्या मांडल्या.

दरम्यान, पुणे आकाशवाणी केंद्राचे प्रसारण सध्या मुंबई येथून होत आहे. त्याऐवजी पुणे केंद्रावरून प्रसारण सुरू व्हावे आणि पुण्यासाठी “रेन्बो’ रेडिओ चॅनेल सुरू करावे. पुणे आकाशवाणीत अद्ययावत सामग्री उपलब्ध व्हावी. कार्यक्रम विभागातील रिक्त जागा तातडीने भराव्यात. पुणे दूरदर्शन केंद्र अद्ययावत व्हावे, अशी मागणी मोहोळ यांनी चर्चेवेळी केली. त्यावर वैष्णव यांनी संबधीत विषयांच्या पूर्ततेसाठी रेल्वे आणि प्रसारण विभागाच्या अधिकाऱ्यांना निर्देश दिले. तसेच महाराष्ट्रात नुकत्याच पार पडलेल्या विधानसभा निवडणुकीत सहप्रभारी म्हणून जबाबदारी यशस्वीपणे निभावल्याबद्दल वैष्णव यांचे मोहोळ यांनी अभिनंदन केले.