Pune Crime : कल्याणीनगर येथील ट्रम्प टॉवरसमोर फोनवर बोलत थांबलेल्या तरुणाला “रागाने का पाहतोस?” असे म्हणत जीवे मारण्याची धमकी देऊन त्याच्याकडील रोख रक्कम जबरदस्तीने लुटणाऱ्या दोन सराईत गुन्हेगारांना येरवडा पोलिसांनी जेरबंद केले.

पोलिसांनी तब्बल ८७ सीसीटीव्ही कॅमेऱ्यांचे फुटेज तपासत तांत्रिक विश्लेषणाच्या आधारे आरोपींचा माग काढला. आरोपींकडून फिर्यादीच्या नावाचे आधारकार्ड, १० हजार रुपये रोख आणि ५० हजार रुपये किमतीची दुचाकी असा एकूण ६० हजार रुपयांचा मुद्देमाल जप्त करण्यात आला आहे.

या प्रकरणी निखील ऊर्फ दाद्या शशिकांत कांबळे (२६, रा. वेताळबाबा वसाहत, गाडीतळ, हडपसर) आणि अयान नासीर शेख (२२, रा. गल्ली नं. १९, सय्यदनगर, हडपसर) यांना अटक करण्यात आली आहे.

दि. १९ ऑगस्ट रोजी कल्याणीनगर येथील ट्रम्प टॉवरसमोर एक व्यक्ती फोनवर बोलत उभी असताना दुचाकीवरून आलेल्या दोन अनोळखी व्यक्तींनी त्याला अडवले. “रागाने का पाहतोस?” असे म्हणत आरोपींनी त्याला जीवे मारण्याची धमकी दिली आणि त्याच्या खिशातील १५ हजार १०० रुपये रोख जबरदस्तीने काढून घेतले. याप्रकरणी येरवडा पोलीस ठाण्यात गुन्हा दाखल करण्यात आला.

गुन्हा दाखल होताच वरिष्ठ अधिकाऱ्यांनी आरोपींचा तातडीने शोध घेण्याच्या सूचना दिल्या. त्यानुसार पोलीस उपायुक्त चिलुमूला रजनिकांत, सहायक पोलीस आयुक्त सुनिल जैतापुरकर यांच्या सूचनेनुसार आणि वरिष्ठ पोलीस निरीक्षक उमेश गित्ते यांच्या मार्गदर्शनाखाली तपास सुरू करण्यात आला.

तपास पथकातील पोलीस अंमलदार साईनाथ म्हस्के आणि अनिल मन्हाळकर यांनी घटनास्थळासह परिसरातील तब्बल ८७ सीसीटीव्ही फुटेज तपासले. त्याचबरोबर तांत्रिक विश्लेषणातून आरोपी हडपसर परिसरात राहत असल्याची माहिती मिळाली. आरोपी हडपसर पोलीस ठाण्याच्या रेकॉर्डवरील गुन्हेगार असल्याचेही तपासात समोर आले. गोपनीय बातमीदाराकडून मिळालेल्या माहितीनुसार हडपसर पोलिसांच्या मदतीने दोघांना ताब्यात घेण्यात आले.

चौकशीत दोघांनी कल्याणीनगर येथे एका व्यक्तीला जीवे मारण्याची धमकी देऊन त्याच्या खिशातून रोख रक्कम लुटल्याची कबुली दिल्याचे पोलिसांनी सांगितले. आरोपींकडून फिर्यादीच्या नावाचे आधारकार्ड, १० हजार रुपये रोख आणि एमएच १२ वायव्ही ७७३५ क्रमांकाची दुचाकी जप्त करण्यात आली आहे.

निखील कांबळेवर २७ गंभीर गुन्हे –

पोलिसांच्या माहितीनुसार निखील ऊर्फ दाद्या शशिकांत कांबळे हा चोरी व जबरी चोरीसह विविध गंभीर गुन्ह्यांमधील सराईत आरोपी असून त्याच्यावर पुणे शहर पोलीस आयुक्तालयाच्या विविध पोलीस ठाण्यांमध्ये तब्बल २७ गुन्हे दाखल आहेत. त्यामध्ये हडपसर, येरवडा, चंदननगर, वानवडी, लोणीकाळभोर, लष्कर, समर्थ आणि विश्रामबाग पोलीस ठाण्यांतील गुन्ह्यांचा समावेश आहे.

त्याच्यावर चोरी, मारहाण, धमकी यांसह महाराष्ट्र पोलीस कायदा आणि भारतीय हत्यार कायद्यान्वयेही कारवाई झालेली आहे. तसेच त्याच्यावर प्रतिबंधात्मक कारवाई करण्यात आली असून दि. ७ ऑगस्ट २०२१ पासून दोन वर्षांसाठी तडीपार करण्यात आले होते. दरम्यान, अयान नासीर शेख याच्यावरही चार गंभीर गुन्हे दाखल असल्याची माहिती पोलिसांनी दिली. या प्रकरणाचा पुढील तपास पोलीस उपनिरीक्षक किशोर बेरड करीत आहेत.

पथकाची कामगिरी –

ही कारवाई पोलीस आयुक्त अमितेश कुमार, पोलीस सहआयुक्त संजय दराडे, अपर पोलीस आयुक्त, पूर्व प्रादेशिक विभाग मनोज पाटील, पोलीस उपायुक्त चिलुमूला रजनिकांत, सहायक पोलीस आयुक्त सुनिल जैतापुरकर, वरिष्ठ पोलीस निरीक्षक उमेश गित्ते आणि पोलीस निरीक्षक (गुन्हे) केशव दिंडे यांच्या मार्गदर्शनाखाली करण्यात आली.

तपास पथकाचे प्रभारी अधिकारी पोलीस उपनिरीक्षक किशोर बेरड, पोलीस हवालदार मुकुंद कोकणे तसेच पोलीस अंमलदार शैलेश वाबळे, साईनाथ म्हस्के, अनिल मन्हाळकर, बालाजी सोगे, गणेश पालवे, संदिप जायभाय, नटराज सुतार आणि सोमनाथ गायकवाड यांनी कारवाईत सहभाग घेतला.