Pune Crime : खून प्रकरणात अटक केलेल्या मुलाला जामीन मिळण्यासाठी मदत करणे, तसेच न्यायालयात आरोपपत्र दाखल करण्यासाठी एका महिलेकडे २५ हजारांची लाच मागणाऱ्या पोलीस हवालदाराला लाचलुचपत प्रतिबंधक विभागाने (एसीबी) अटक केली. बारामतीतील वडगाव निंबाळकर पोलीस ठाण्यात गुन्हा दाखल झाला आहे. या प्रकरणी पोलीस हवालदार रमेश लक्ष्मण नागटिळक (वय ४२, रा. शारदानगर, माळेगाव, बारामती) याला अटक केली आहे. ४६ वर्षीय महिलेच्या तक्रारीनुसार त्यांच्या मुलाविरुद्ध वडगाव निंबाळकर पोलीस ठाण्यात खुनाचा गुन्हा दाखल आहे. करंजेपुल पोलीस चौकीत पोलीस हवालदार रमेश नागटिळक नियुक्तीस आहे. फिर्यादींच्या मुलास जामीन मिळवून देण्यासाठी मदत करतो, तसेच आरोपपत्र न्यायालयात दाखल करण्यासाठी नागटिळक आणि उपनिरीक्षकाने ३० हजारांची रुपयांची लाच मागतिली. तपासात नागटिळकने तडजोडीत २५ हजारांची लाच मागितल्याचे निष्पन्न झाले. मात्र, उपनिरीक्षकाने लाच मागितली नव्हती. त्यामुळे नागटिळक याच्यावर गुन्हा दाखल करुन त्याला अटक केली. पोलीस अधीक्षक शिरीष सरदेशपांडे, अतिरिक्त पोलीस अधीक्षक अजित पाटील, अर्जुन भोसले यांच्या मार्गदर्शनाखाली पोलीस निरीक्षक अविनाश घरबुडे आणि पथकाने ही कारवाई केली. पोलीस निरीक्षक आसावरी शेडगे तपास करत आहेत.
