Pune Crime – नांदेड सिटीतील विद्या प्रतिष्ठानच्या पवार पब्लिक स्कूलमध्ये कार्यरत असलेल्या क्लार्कनेच शाळेची तब्बल ३७ लाखांची अफरातफर केली आहे. इंटरनेट बँकिंगद्वारे ही रक्कम आरोपीने स्वतःच्या पत्नीच्या खात्यात वळविली आहे. या प्रकरणी शाळेच्या प्राचार्या वंदना सचिन जोशी (वय ५५, रा. चंद्रगंगा सोसायटी, आंबेगाव बुद्रुक) यांनी नांदेड सिटी पोलीस ठाण्यात फिर्याद दिली आहे. पोलिसांनी राजेंद्र अनपट व त्याची पत्नी अश्विनी अनपट उर्फ अश्विनी तरटे यांच्याविरुद्ध गुन्हा दाखल केला आहे. ही घटना ५ नोव्हेंबर २०२४ ते ३ जून २०२५ या कालावधीत घडली. विद्या प्रतिष्ठान ही नामांकित शैक्षणिक संस्था असून तिचे संस्थापक अध्यक्ष ज्येष्ठ नेते शरद पवार आहेत. या संस्थेअंतर्गत येणाऱ्या पवार पब्लिक स्कूलमध्ये आरोपी राजेंद्र अनपट हा क्लार्क म्हणून कार्यरत होता. अनपट याने पदाचा गैरफायदा घेत शाळेच्या खात्यातून परवानगीशिवाय इंटरनेट बँकिंगद्वारे पैसे काढून ते पत्नीच्या खात्यात वर्ग केले. तसेच ही अफरातफर लपविण्यासाठी संस्थेच्या नोंदींमध्ये बनावट कागदपत्रे तयार केली होती. संस्थेच्या लेखापरीक्षणादरम्यान (ऑडिट) ही आर्थिक गैरव्यवहाराची बाब उघडकीस आली. तपासात एकूण ३६ लाख ९९ हजार ९८८ रुपयांची अफरातफर झाल्याचे स्पष्ट झाले. त्यानंतर पोलिसांत तक्रार दाखल करण्यात आली.
