Pune Crime – पुणे शहर पोलीसांच्या गुन्हे शाखेतील अंमली पदार्थ विरोधी पथकाने कुंजीरवाडी ग्रामपंचायतीच्या हद्दीतील धुमाळ मळा परिसरात छापा टाकून सुमारे साडे दहा लाख रुपयांचा गांजा आणि 30 लाख रुपयांची फॉर्च्युनर गाडी असा एकूण 40 लाख 70 हजार 280 रुपयांचा मुद्देमाल जप्त केला आहे. या कारवाईत प्रीतम रविंद्र कुंजीर (वय 32, रा. धुमाळ मळा, कुंजीरवाडी, ता. हवेली) याला अटक करण्यात आली आहे. याबाबत अंमली पदार्थ विरोधी पथक-1 चे वरिष्ठ पोलीस निरीक्षक वाहीद पठाण यांनी माहिती दिली. या प्रकरणी पथकाचे हवालदार विजय शहाजी कांबळे यांनी फिर्याद दाखल केली आहे. 11 मार्च रोजी पहाटे सुमारे सव्वा पाचच्या सुमारास रविंद्र कुंजीर यांच्या घरासमोरील मोकळ्या जागेत ही कारवाई करण्यात आली. प्रीतम कुंजीर याने ‘कट्टीमनी’ व ‘अक्षय’ नावाच्या व्यक्तींकडून हा गांजा विक्रीसाठी आणल्याची माहिती पोलिसांनी दिली. राज्यात गांजासारख्या अंमली पदार्थांची वाहतूक करणे, जवळ बाळगणे किंवा विक्रीसाठी साठवणूक करणे कायद्याने बंदी आहे. तरीही आरोपीकडे 53 किलो 14 ग्रॅम वजनाचा सुमारे 10 लाख 60 हजार 280 रुपयांचा गांजा आढळून आला. हा गांजा 30 लाख रुपये किमतीच्या फॉर्च्युनर गाडीतून विक्रीसाठी ठेवण्यात आल्याचे पोलिस तपासात समोर आले आहे. या प्रकरणी आरोपीविरुद्ध मादक औषधी पदार्थ अधिनियम (एनडीपीएस) अंतर्गत गुन्हा दाखल करण्यात आला असून पुढील तपास अंमली पदार्थ विरोधी पथकाचे सहायक पोलीस निरीक्षक अनिल सुरवसे करत आहेत. या कारवाईदरम्यान वरिष्ठ पोलीस निरीक्षक वाहीद पठाण, राजेंद्र पन्हाळे, सहायक पोलीस निरीक्षक अनिल सुरवसे, उपनिरीक्षक योगेश पैठणे, आकांक्षा तावरे आदी अधिकार्यांनी घटनास्थळी भेट दिली.
