Pune Crime – विमानतळ पोलिसांनी छापा टाकून स्पा सेंटरच्या नावे सुरू असलेल्या वेश्याव्यवसायावर कारवाई केली. यावेळी दोघे जण इमारतीच्या पहिल्या मजल्यावरील गॅलरीतून खाली पळून जात असता खाली पडून ते जखमी झाले. त्यामध्ये एक स्पा मॅनेजर तर दुसरी महिला आहे. स्पा मॅनेजरचा पाय मोडला असून, महिलेच्या डोक्याला गंभीर दुखापत झाली आहे. दोघांवर ससून रुग्णालयात उपचार सुरूअसल्याचे पोलीस उपायुक्त सोमय मुंडे यांनी सांगितले. हुसेन शेख असे स्पा मॅनेजरचे नाव आहे. याप्रकरणी, रात्री उशीरापर्यंत विमानतळ पोलीस ठाण्यात गुन्हा दाखल करण्याचे काम सुरु होते. ही घटना अहिल्यानगर रोड विमानतळ परिसरातील सिटी स्पेस बिल्डिंग पहिला मजला द रुटस् स्पा येथे सोमवारी (दि.23) साडेतीन वाजताच्या सुमारास घडली आहे. पोलिसांनी दिलेली माहिती अशी की, सिटी स्पेस बिल्डिंगमधील पहिल्या मजल्यावर असलेल्या द रुटस् स्पा सेंटरमध्ये वेश्या व्यवसाय सुरू असल्याची माहिती मिळाली, पोलिसांनी बनावट ग्राहक पाठवून खात्री केली. वरिष्ठ पोलीस निरीक्षक गोविंद जाधव, महिला अंमलदार, पंचासमक्ष स्पावर कारवाई करण्यासाठी सिटी स्पेस बिल्डिंगध्ये दाखल झाले. पोलिसांनी काचेचा दरवाजा तोडून आत प्रवेश केला असता, तेथे चार पिडीत महिला आणि चार पुरूष आढळून आले. पोलिसांना एका केबीनचा बंद दरवाजा तोडून आत प्रवेश केला असता एक महिला आढळून आली. तिने सांगितले की, दोघे जण गॅलरीमार्गे खाली उतरत आहेत. पोलिसांनी जाऊन पाहिले तेव्हा त्यांना दोघेजण खाली पडल्याचे दिसून आले. त्यामध्ये एक महिला आणि एक पुरुष होता. पोलिसांनी तत्काळ धाव घेत दोघांना सरकारी गाडीतून नजीकच्या खासगी रुग्णालयात दाखल केले. चौकशीत पायाला दुखापत झालेला पुरूष हा स्पा मॅनेजर असल्याचे समोर आले. त्यानंतर दोघांना ससून रुग्णालयात दाखल करण्यात आले. महिलेच्या डोक्याला गंभीर दुखापत झाली असून, तिच्यावर उपचार सुरू असल्याचे पोलिसांनी सांगितले. घटनेची माहिती मिळताच पोलीस उपायुक्त सोमय मुंडे यांच्यासह इतर अधिकाऱ्यांनी घटनास्थळी भेट दिली.
