Pune Crime News : शहरातील वाहनचोरीच्या वाढत्या घटनांवर आळा घालण्यासाठी कारवाई करताना गुन्हे शाखा युनिट १ ने एका सराईत चोरट्याला अटक केली आहे. या कारवाईत चोरीस गेलेली दुचाकीही जप्त करण्यात आली आहे. विश्रामबाग पोलीस ठाण्यात दाखल गुन्ह्याचा समांतर तपास गुन्हे शाखा युनिट १ कडून सुरू होता. तपासादरम्यान १८ मार्च २०२६ रोजी पोलीस उपनिरीक्षक राहुल मखरे, पोलीस अंमलदार पेरणे, जमदाडे, काकडे, डोंगरे, मठपती, निलेश साबळे यांच्या पथकाने वरिष्ठांच्या मार्गदर्शनाखाली आरोपीचा शोध घेतला. यावेळी पोलीस अंमलदार मठपती यांना गुप्त बातमीदारामार्फत माहिती मिळाली की, संबंधित आरोपी हा गल्ली नं. २, सुपर इंदिरानगर, अप्पर बिबवेवाडी येथे वास्तव्यास आहे. ही माहिती तात्काळ पोलीस निरीक्षक अजित जाधव (गुन्हे शाखा, युनिट १) यांना देण्यात आली. त्यांनी खात्री करून आवश्यक कायदेशीर कारवाई करण्याचे आदेश दिले. त्यानुसार पथकाने सापळा रचून आरोपी सुरज शिवाजी सुरवसे (वय २५, रा. सुपर इंदिरानगर, अप्पर बिबवेवाडी, पुणे) याला ताब्यात घेतले. त्याच्याकडून चोरीस गेलेली सुमारे २५ हजार रुपये किमतीची होंडा कंपनीची युनिकॉर्न मॉडेलची सिल्व्हर रंगाची दुचाकी (आरटीओ क्रमांक MH 12 GP 3361) जप्त करण्यात आली आहे.या प्रकरणाचा पुढील तपास विश्रामबाग पोलीस ठाण्याकडून करण्यात येत आहे. ही कामगिरी अपर पोलीस आयुक्त पंकज देशमुख, पोलीस उपायुक्त (गुन्हे) निखील पिंगळे, सहाय्यक पोलीस आयुक्त (गुन्हे १) शैलेश संखे यांच्या मार्गदर्शनाखाली पोलीस निरीक्षक अजित जाधव यांच्या नेतृत्वात पार पडली. या कारवाईत अमित जमदाडे, हेमंत पेरणे, मठपती, शशिकांत दरेकर, संदेश काकडे, महिला पोलीस अंमलदार ज्योती मुल्का, डोंगरे आणि प्रफुल शेलार यांनी सहभाग घेतला.
