पुणे- गुंतवणूक केलेल्या रकमेवर वार्षिक 24 टक्के परतावा देण्याचे आमिष दाखवून गुंतवणूकदारांची कोट्यवधी रुपयांची फसवणूक करणाऱ्या सोमजी दाम्पत्याला पुणे पोलिसांच्या खंडणी विरोधी पथक दोनच्या पोलिसांनी दिल्ली विमानतळावरुन ताब्यात घेतले आहे. आरोपींना मंगळवारी दिल्ली न्यायालयात हजर केले असता, न्यायालयाने त्यांना ट्रान्झिट रिमांडमध्ये पाठवले आहे. हे दोघेही कॅनडा देशात स्थायिक होण्यासाठी पळण्याच्या तयारीत होते.
अलनेश अकील सोमजी (37, रा. अमर वेस्टव्हिड, लेन नं. 5, कोरेगाव पार्क, पुणे) आणि त्याच्या पत्नीला अटक करण्यात आली आहे. पोलिसांनी दिलेल्या माहितीनुसार, “आरोपींनी पुण्यातील अनेकांना एम.जे.एंटरप्रायजेस कंपनीद्वारे वार्षिक 18 ते 24 टक्के परतावा देण्याच्या बहाण्याने अनेकांना गंडा घातला होता.
गुन्हा दाखल झाल्यानंतर आरोपी फरार झाले होते. दि.29 ऑक्‍टोबर रोजी या दाम्पत्याविरोधात लुकआऊट नोटीस जारी करण्यात आली होती. या दोघांना दिल्ली विमानतळावर इमिग्रेशनने ताब्यात घेतले. आरोपींना पहाटेच्या सुमारास ताब्यात घेतल्यानंतर याची माहिती पुणे पोलिसांना कळवण्यात आली. त्यानुसार गुन्हे शाखेच्या खंडणी विरोधी पथक दिल्ली येथे रवाना झाले. पथकाने कायदेशीर कारवाई करुन दाम्पत्याला ताब्यात घेतले. ही कारवाई पोलीस आयुक्त अमिताभ गुप्ता, सह पोलीस आयुक्त डॉ. रवींद्र शिसवे, अपर पोलीस आयुक्त गुन्हे रामनाथ पोकळे, पोलीस उपायुक्त गुन्हे श्रीनिवास घाडगे, सहायक पोलीस आयुक्त गुन्हे-1 लक्ष्मण बोराटे यांच्या मार्गदर्शनाखाली पोलीस निरीक्षक बालाजी पांढरे, पोलीस उपनिरीक्षक श्रीकांत चव्हाण, अंमलदार सौदाबा भोजराव, अमोल पिलाणे, आशा कोळेकर, विजय गुरव, संग्राम शिनगारे, सुरेंद्र जगदाळे, शैलेश सुर्वे, राहुल उत्तरकर यांच्या पथकाने केली.
सोमजी दाम्पत्याविरुद्ध तीन गुन्हे दाखल झाले आहेत. यात त्यांनी 3 कोटी 37 लाखांची फसवणूक केली आहे. त्यांच्याविरुद्ध 27 ऑक्‍टोबरला गुन्हा दाखल झाला होता. त्यांनी फिर्यादीला 2018 पासून परतावा देणे बंद केले होते. त्यांच्याविरुद्ध तक्रार दाखल करण्यास आणखी काही गुंतवणूकदार पुढे येत आहेत.
– बालाजी पांढरे,
पोलीस निरीक्षक
