पुणे – पुणे महापालिकेच्या इंग्रजी माध्यमांच्या प्राथमिक शाळांसाठी सहा महिन्यांकरिता मानधनावर शिक्षकांच्या नियुक्‍त्या करण्यात येणार आहेत. यासाठी शिक्षकांना अर्ज सादर करण्यासाठी 31 मेपर्यंतची मुदत देण्यात आलेली आहे.

सन 2022-23 हे शैक्षणिक वर्ष पुढील महिन्यात सुरू होणार आहे. त्यापूर्वीच इंग्रजी माध्यमांच्या शाळांसाठी शिक्षक भरती करण्याची गरज भासू लागली आहे. दरमहा 15 हजार रुपये मानधनावर हंगामी स्वरूपात या शिक्षकांच्या नेमणुका होणार आहेत. प्राथमिक शिक्षक या पदांसाठी निवड, प्रतीक्षा यादी, शैक्षणिक व व्यावसायिक पात्रतेच्या प्राप्त गुणानुक्रमे यांना प्राधान्य देऊन नेमणुका होणार आहेत.

शैक्षणिक, व्यावसायिक अर्हता व अटींची पुर्तता करणाऱ्या वैयक्तिक माहितीसहचे अर्ज, गुणपत्रक व प्रमाणपत्रांच्या प्रमाणित स्वयंसाक्षांकित, छायांकित प्रतीसह महापालिकेच्या प्राथमिक शिक्षण विभागाकडे सकाळी 11 ते दुपारी 2 या वेळेत समक्ष अर्ज सादर करण्यासाठी मुदत देण्यात आलेली आहे. पोस्टाने किंवा टपालाने अर्ज स्वीकारण्यात येणार नाहीत. अर्ज सादर करताना उमेदवारांनाच्या मूळ कागदपत्रांची पडताळणीही करण्यात येणार आहे.