पुणे :  संविधानाच्या अमृत महोत्सवांतर्गत “घर घर संविधान’ हा उपक्रम सामाजिक न्याय विभागाच्यावतीने राज्यभरात राबविण्यात येत आहे. या उपक्रमांतर्गत प्रजासत्ताक दिनी संविधानाचा जागर होणार आहे, अशी माहिती समाज कल्याण सहायक आयुक्त विशाल लोंढे यांनी दिली आहे.

या दिवशी संविधानाच्या प्रस्ताविकेचे वाचन करण्यात येणार आहे. तसेच भारतीय संविधानाबद्दल माहिती देणारे कार्यक्रम व पालकमंत्री यांच्या हस्ते संविधानाच्या प्रस्ताविकेचे वाटप करण्यात येणार आहे.

भारतीय राज्यघटनेबाबत जागरूकता तसेच संविधानाची मूल्ये विद्यार्थी तसेच नागरिकांपर्यंत पोहोचावीत यासाठी राज्यातील शैक्षणिक संस्‍थांसह सर्व ठिकाणी “घर घर संविधान’ हा उपक्रम २६ नोव्हेंबर २०२४ पासून राबविण्यात येत आहे.

या उपक्रमांतर्गत विविध शाळा महाविद्यालयांमध्ये विविध स्पर्धा, व्याख्यान, दौड, रॅली व संविधान जनजागृती कार्यक्रमांचे आयोजन राज्यभरात करण्यात आले आहे, असेही लोंढे यांनी सांगितले.