पुणे : भाड्याने घर मिळवून दिल्यानंतर ब्रोकरेज न दिल्याच्या कारणावरून पुण्यात नोकरीनिमित्त आलेल्या लष्कर अधिकाऱ्याच्या मुलीला शिवीगाळ करून मारहाण करण्याची धमकी दिल्याप्रकरणात महिला एजंट आणि तिच्या साथीदाराला जामीन झाला आहे. लष्कर न्यायालयाने हा जामीन दिला आहे.

याबाबत 34 वर्षीय तरूणीने कोंढव पोलीस ठाण्यात तक्रार दिली आहे. त्यानुसार महिलेसह दीपक शर्मा यांच्यावर गुन्हा दाखल आहे. त्या दोघांना जामीन मिळाला आहे. बचाव पक्षातर्फे ऍड. बिपीन पाटोळे, ऍड. भूपेंद्र गोसावी, ऍड. कुलदीप पाटील, ऍड. मनोज चौधरी यांनी जामिनासाठी अर्ज केला होता.

ती तरूणी काही दिवसांपूर्वी पुण्यात आली होती. तिचे वडील कर्नल आहेत. तिला दोघांनी उंड्री भागात राहण्यासाठी घर मिळवून दिले होते. त्या बदल्यात सात हजार रुपये देण्याचे ठरले होते. ते मागण्यासाठी दोघे 15 जून रोजी घरी गेले होते. पैसे न दिल्याने फिर्यादीला मारण्याची धमकी देण्यात आल्याचे फिर्यादीत म्हटले आहे.