पुणे –  गुंतवणुकीवर जादा परतव्याचे आमिषाने १०० कोटी रुपयांची फसवणूक करणाऱ्या पुण्यातील व्हीआयपीएस ग्रुप ऑफ कंपनीची पाच कोटी रुपयांची मालमत्ता सक्तवसुली संचलनालयाने (ईडी) जप्त केली. या कारवाईत रोकड, मुदतठेवीच्या पावत्या, दागिने जप्त करण्यात आली, अशी माहिती ईडीने दिली.

ईडीच्या पथकाने पुणे, नाशिक, कोल्हापूर येथील या कंपनीच्या कार्यालयांवर छापे टाकले. या प्रकरणाचा मुख्य सूत्रधार विनोद खुटे दुबईत पसार झाल्याचा संशय आहे. व्हीआयपीएस कंपनी आणि ग्लोबल अॅफिलेट बिझनेस कंपनीने गुंतवणुदारांना गुंतवणुकीवर आकर्षक व्याजदराचे आमिष दाखविले होते. विनोद खुटेने परदेशी मुद्रा विनिमय व्यवहार (फाॅरेक्स) ट्रेडिंग कंपनी सुरू केली होती.

गुंतवणुदारांकडून आलेले पैसे त्याने कान्हा कॅपिटल कंपनीत वळविले होते. त्याने गुंतवणूकदारांकडून आलेले पैसे बनावट कंपनीच्या नावाने उघडलेल्या खात्यात वळवले होते. त्याने जवळपास १०० कोटी रुपयांची रक्कम हवालामार्गे परदेशात पाठविली आहे.

व्हीआयपीएस कंपनीचे संचालक विनोद खुटे, संतोष खुटे, मंगेश खुटे (तिघे रा. निर्माण व्हिवा सोसायटी, आंबेगाव बुद्रुक), किरण अनारसे, अजिंक्य बडघे यांच्यासह साथीदारांविरुद्ध गुन्हा दाखल करण्यात आला होता. गुंतवणूकदारांना जादा परतव्याचे आमिष दाखवून कंपनीचा संचालक विनोद खुटे आणि साथीदारांनी फसवणूक केली होती. आंबेगाव बुद्रुक परिसरातील कार्यालयाला खुटे टाळे लावून पसार झाला.

गुंतवणुकदारांना परतावा दिला नसल्याने शेकडो गुंतवणुकदारांनी पोलिसांकडे तक्रार दिली होती. तपासात खुटे आणि साथीदारांनी १०० कोटी रुपयांची फसवणूक केल्याचे उघडकीस आले. याबाबत ईडीचे सहायक संचालक रत्नेशकुमार कर्ण (वय ४३) यांनी भारती विद्यापीठ पोलीस ठाण्यात फिर्याद दिली होती.

गुजरातमध्येही कारवाई

जून-2023 मध्ये पुणे, मुंबई, तसेच अहमदाबादमधील व्हीआयपीएस कंपनी, तसेच अहमदाबादमधील ग्लोबल अॅफिलेट बिझनेस संस्थांवर ईडीच्या मुंबई विभागीय कार्यालायने ही कारवाई केली होती. पीएमएलए (प्रिव्हेंशन ऑफ मनी लाॅंडरिंग अॅक्ट) कायद्यान्वये कारवाई केली होती.

विनोद खुटेच्या कुटुंबीयांच्या नावे असलेली आठ कोटी ९८ लाख रुपयांची मालमत्ता, व्हीआयपीएस आणि ग्लोबल अॅफिलेट बिझनेस कंपनीच्या नावावर असलेल्या पाच सदनिका, दोन मालमत्ता, दोन कार्यालये आणि नगर येथील दोन हेक्टर जमीन जप्त करण्यात आली होती. मार्चमध्ये ईडीने छापे टाकून २४ कोटी ४१ लाख रुपयांची मालमत्ता जप्त केली होती.

आतापर्यंत ७१ कोटींच्या मालमत्तेवर टाच

फसवणूक प्रकरणाचा मुख्य सूत्रधार विनोद खुटे याने वेगवेगळ्या नावे दोन वित्तीय संस्था सुरू करुन गुंतवणुकदारांची १०० कोटी रुपयांहून जास्त रकमेची फसवणूक केली होती. हवालाच्या माध्यमातून त्याने ही रक्कम परदेशात पाठविल्याचे तपासात उघडकीस आले होते. आतापर्यंत ७० कोटी ८९ लाख रुपयांची मालमत्ता जप्त करण्यात आली आहे.