पुणे  – शहरात शिवसेनेला एकही जागा मिळाली नसली तरी युतीधर्म पाळत शहर शिवसेनेकडून आठही विधानसभा मतदारसंघात मित्रपक्षांच्या उमेदवारांचा जोमाने प्रचार केला जात आहे. त्यासाठी, शिवसेनेचे शहर प्रमुखनाना भानगिरे यांच्यासह इतर पदाधिकारी सर्व उमेदवारांच्या प्रचारफेऱ्या, बैठका तसेच घरघरी जाऊन प्रचार करीत आहेत. पक्षाचा उमेदवार नसला तरी महायुती म्हणून आम्ही एक आहोत आणि राज्यात महायुतीचे सरकार आणणे हेच आमचे ध्येय असल्याचे शहर शिवसेना प्रमुखनाना भानगिरे यांच्याकडून सांगण्यात आले.

राज्यात विधानसभा निवडणुकीच्या प्रचाराची रणधुमाळी सुरू आहे. पुण्यात जागा न मिळाल्याने शिवसेनेच्या स्थानिक पदाधिकाऱ्यांकडून नाराजीही व्यक्त करण्यात आली होती. मात्र, पक्षापुढे कोणी मोठे नाही याची प्रचिती देत शहर पदाधिकारी जागा न मिळाल्याने असलेली नाराजी दूर ठेवून महायुतीच्या प्रचारात उतरली. शहरातील सर्वच मतदारसंघात शिवसेनेकडून घरोघरी जाऊन प्रचार केला जात आहे. तसेच महायुतीच्या उमेदवारांसाठी प्रचार फेऱ्याही काढण्यात येत असल्याचे भानगिरे यांनी प्रभातशी बोलताना सांगितले.

“आम्ही महायुती म्हणून राज्यात निवडणुकांना सामोरे जात आहोत. पक्षाला पुण्यात जागा मिळालेली नसली तरी आमच्या मित्रपक्षाच्या उमेदवारांचा प्रचार करीत आम्ही महायुतीचा धर्म पाळत आहोत. राज्यात महायुती सरकाराने मुख्यमंत्री एकनाथ शिंदे यांच्या नेतृत्वाखाली महिला, शेतकरी, युवा, ज्येष्ठ नागरिक यांच्यासाठी राबविलेल्या योजना तसेच राज्यात केलेली विकासकामे आम्ही मतदारांपर्यंत घेऊन जात असून महायुतीच्या उमेदवारांना चांगला प्रतिसाद मिळत आहे.”
– प्रमोदनाना भानगिरे, शिवसेना, शहर प्रमुख