पावणेदोन कोटींचा दंड वसूल
पुणे – पुणे रेल्वे प्रशासनाने फेब्रुवारी महिन्यात केलेल्या विशेष तपासणी मोहिमेत 20 हजार 537 जणांना विनातिकीट प्रवास करताना पकडले. त्यांच्याकडून 1 कोटी 73 लाख रुपये एवढा दंड वसूल करण्यात आला आहे. यावरून रेल्वेने विनातिकीट प्रवास करणाऱ्यांची संख्या लक्षणीय असल्याचे स्पष्ट होत आहे.

रेल्वेमधून फुकट प्रवास करणे किंवा फ्लॅटफॉर्म तिकीट न घेता फिरणे, सेकंड क्‍लासचे तिकीट काढून फर्स्ट क्‍लासच्या डब्यातून प्रवास करणे अशा विविध कारणांसाठी रेल्वे प्रशासानकडून प्रवाशांवर कारवाई केली जाते. पुणे विभागातून दररोज शेकडो रेल्वे धावतात. यामध्ये पुणे स्टेशनहून धावणाऱ्या रेल्वेची संख्या मोठी असून, देशाच्या विविध भागांत प्रवाशांची ये-जा असते. या रेल्वेमध्ये विनातिकीट प्रवास करणाऱ्यांची संख्या लक्षणीय असल्याचे दिसून येत आहे.

प्रशासनाने पुणे विभागात फेब्रुवारी या एका महिन्यात 20 हजार 537 जणांवर दंडात्मक कारवाई केली आहे. यामुळे रेल्वेने फुकट प्रवास करणाऱ्यांच्या संख्येत वाढ होत असल्याचे दिसून येत आहे. अशा प्रवाशांमुळे रेल्वेचा महसूल बुडून पर्यायाने रेल्वेला तोटा सहन करावा लागतो. यामुळे अशा फुकट्यांवर कडक कारवाई करण्याचे आदेश प्रशासनातील वरिष्ठानी दिले होते. यानूसार पुणे विभागात ही कारवाई करण्यात आली, अशी माहिती रेल्वे प्रशासनाकडून देण्यात आली.

रेल्वेने साहित्य वाहतूक करताना त्याची बुकींग करणे अपेक्षित आहे. विनाबुकींग माल, साहित्य वाहतूक करणाऱ्या 171 जणांवर रेल्वे प्रशासनाने कारवाई केली. त्यांच्याकडून 19 हजार रुपयांचा दंड वसूल करण्यात आल्याची माहिती रेल्वे प्रशासनाकडून देण्यात आली.