वालचंदनगर : आनंदनगर (ता. इंदापूर) ग्रामपंचायतीच्या गावठाण विस्तारासाठी शेती महामंडळाची जागा उपलब्ध करून देण्यात यावी, अशी मागणी आनंदनगरचे सरपंच व इंदापूर कृषी उत्पन्न बाजार समितीचे संचालक रोहित मोहोळकर यांनी कृषीमंत्री दत्तात्रय भरणे यांच्याकडे केली आहे. ग्रामपंचायत प्रशासनाच्या वतीने रविवारी भरणेवाडी येथील निवासस्थानी ही मागणी करण्यात आली.

यावेळी सरपंच मोहोळकर म्हणाले, आनंदनगर ग्रामपंचायतीकडे गावठाणासाठी एक गुंठाही जागा उपलब्ध नाही. पर्यायाने गावात कोणतीही शासकीय विकासकामे करताना जागेची मोठी अडचण निर्माण होत असून, गावचा विकास खुंटला आहे. ही समस्या सोडवण्यासाठी आणि विविध लोकोपयोगी कामे मार्गी लावण्यासाठी गावठाणासाठी हक्काची जागा मिळावी म्हणून आम्ही शेती महामंडळ व आमदार दत्तात्रय भरणे यांच्याकडे पाठपुरावा सुरू केला आहे.

मंत्री भरणे यांनी या मागणीची दखल घेत, जागा उपलब्ध करून देण्याबाबत संबंधितांना आवश्यक त्या सूचना दिल्या असून, सकारात्मक निर्णय घेण्याचे आश्वासन दिले असल्याचे मोहोळकर यांनी सांगितले. याप्रसंगी उपसरपंच सुधाकर कणसे, ग्रामपंचायत सदस्य सुयश चौधरी, विलास पवार, अश्विन जाधव आणि ग्रामसेवक राजेंद्र काळे उपस्थित होते.

हेही वाचा : Pune District : आळंदीत कर्मचारी, सुरक्षारक्षक, सेवेकऱ्यांसाठी नवे नियम