Pune : दी प्रोफेशनल रियल्टर्स ऑफ पुणे (प्रॉप) आणि नॅशनल असोसिएशन ऑफ रियल्टर्स-इंडिया (नार-इंडिया) यांच्या संयुक्त विद्यमाने ‘प्रॉप कनेक्ट २०२६’ या देशातील सर्वात मोठ्या एकदिवसीय रियल इस्टेट सल्लागार परिषदेचे आयोजन करण्यात आले आहे. ही परिषद रविवार, ६ जुलै २०२६ रोजी सकाळी ९ ते रात्री ९ या वेळेत पुण्यातील जेडब्ल्यू मॅरिएट हॉटेल येथे होणार असून, देशातील ३८ शहरांतील दोन हजारांहून अधिक रियल्टर्स आणि ३०० हून अधिक विकसक या परिषदेत सहभागी होणार आहेत.

‘प्रॉप’चे अध्यक्ष उदयन माने आणि ‘प्रॉप कनेक्ट २०२६’चे संयोजक रमेश तोष्णीवाल यांनी पत्रकार परिषदेत ही माहिती दिली. यावेळी माजी अध्यक्ष दर्शन चावला, तनुज नगरानी, नीरज सिंग, मनीष दीडमिसे, मुरली रमनी, दिनेश राठी, सारंग मद्रेवार, महेश यादव, रवींद्र यादव, विक्रम मलिक आणि प्रीत कोहली उपस्थित होते.

उदयन माने म्हणाले, “‘रियल्टर्स – फ्युएलिंग द फ्युचर’ या संकल्पनेवर आधारित या परिषदेत रियल इस्टेट क्षेत्रातील तज्ज्ञ, विकसक, धोरणकर्ते आणि तंत्रज्ञान क्षेत्रातील मान्यवर एकत्र येणार आहेत. नेटवर्किंग, ज्ञानविनिमय आणि व्यवसायवृद्धीसाठी हे व्यासपीठ महत्त्वाचे ठरणार आहे. तसेच पुण्याच्या भविष्यातील विकास, कृत्रिम बुद्धिमत्ता, ऑटोमेशन, उद्योजकता आणि व्यवसाय विस्तार यांसारख्या विषयांवर तज्ज्ञ मार्गदर्शन करणार आहेत.”

रमेश तोष्णीवाल यांनी सांगितले की, पुणे महानगर प्रदेश विकास प्राधिकरणाचे (पीएमआरडीए) आयुक्त डॉ. अभिजित चौधरी हे पुण्याच्या आगामी विकासाच्या दिशेबाबत व्याख्यान देणार आहेत. तसेच ‘द पंचशील स्टोरी’ या विशेष संवाद सत्रात अतुल चोरडिया सहभागी होणार असून, ‘स्टोरी ऑफ द टायटन्स’ या सत्रात देशातील आघाडीचे विकसक रियल इस्टेट क्षेत्राच्या भविष्यासंदर्भात चर्चा करणार आहेत. पुण्यातील नामांकित बांधकाम व्यावसायिकही विविध चर्चासत्रांत सहभागी होणार असल्याचे त्यांनी नमूद केले.

माजी अध्यक्ष दर्शन चावला यांनी सांगितले की, कृत्रिम बुद्धिमत्ता आणि ऑटोमेशन या विषयावर वैभव सिसिंटी मार्गदर्शन करणार असून, सीए सार्थक आहुजा हे २०२७ मधील रियल इस्टेट बाजारपेठेचा आढावा सादर करणार आहेत. उद्योग विस्तारासंदर्भात राजीव तलरेजा मार्गदर्शन करतील. तर, प्रसिद्ध विनोदी कलाकार विपुल गोयल यांच्या विशेष कार्यक्रमाने परिषदेची सांगता होणार आहे. याशिवाय सीएसआर उपक्रम, भागीदारांचा गौरव आणि गाला डिनरचेही आयोजन करण्यात आले आहे.

तनुज नगरानी यांनी सांगितले की, रिअल्टर्स आणि विकसक यांच्यात अधिक प्रभावी समन्वय निर्माण करणे, तसेच उद्योग क्षेत्रातील नव्या संधींबाबत मार्गदर्शन करणे हा परिषदेचा प्रमुख उद्देश आहे. ३०० हून अधिक विकसक आणि भागीदारांचा सहभाग हा संघटित रिअल्टर चळवळीला मिळालेल्या वाढत्या पाठिंब्याचे प्रतीक असल्याचे त्यांनी सांगितले.