प्रभात वृत्तसेवा पुणे – शैक्षणिक सहलीसाठी नवीन बस उपलब्ध करून देण्याचा निर्णय घेतल्यानंतर शाळा-महाविद्यालयांकडून एसटीच्या नवीन बसची मागणी वाढली आहे. परिणामी राज्यात नोव्हेंबर महिन्यात जवळपास २ हजार २४३ बस सहलीसाठी दिल्या असून, त्यातून एसटीला अकरा कोटीचे उत्पन्न मिळाले आहे. त्यामध्ये पुणे जिल्ह्यात १२३ बस देण्यात आले आहेत. शालेय सहलींना एसटी महामंडळाकडून बसेस उपलब्ध करून दिल्या जातात. सरकारकडून एसटीच्या माध्यमातून विद्यार्थ्यांच्या शालेय सहलीला ५० टक्के सवलत दिली जाते. त्यामुळे अतिशय माफक दरामध्ये विद्यार्थ्यांना शालेय सहलीचा अनुभव घेता येतो. मात्र, काहीवेळा एसटीच्या जुन्या बस सहलीसाठी सोडत असल्यामुळे शाळांकडून खासगी बस बुक करीत असल्याचे दिसून आले. यंदा परिवहन मंत्री तथा एसटी महामंडळाचे अध्यक्ष प्रताप सरनाईक यांनी शालेय सहलीसाठी नवीन बसेस उपलब्ध करून देण्याच्या सूचना एसटी प्रशासनाला दिल्या होत्या. त्यामुळे एसटीकडून नवीन लालपरी अथवा इतर नवीन बस शालेय सहलीसाठी दिल्या जात आहे. त्यामुळे शाळांकडून एसटीच्या बसला अधिक मागणी वाढल्याचे आकडेवारीवरून दिसून येते. या नव्या कोऱ्या एसटीतून राज्यभरातील हजारो विद्यार्थी गड – किल्ले, नयनरम्य समुद्र किनारे, धार्मिक स्थळे यांना भेटी दिल्या आहेत.
