Prince Andrew: बदनाम अमेरिकन फायनान्सर आणि लैंगिक गुन्हेगार जेफरी एपस्टीन याच्या प्रकरणाने ब्रिटीश राजघराण्याला पुन्हा एकदा हादरा दिला आहे. या प्रकरणात आता एका नवीन महिलेने समोर येत प्रिन्स अँड्र्यू यांच्यावर अत्यंत गंभीर आणि खळबळजनक आरोप केले आहेत. २०१० मध्ये एपस्टीनने आपल्याला विशेषतः प्रिन्स अँड्र्यू यांच्यासोबत शारीरिक संबंध ठेवण्यासाठी लंडनला पाठवले होते, असा दावा या पीडितेने केला आहे. या नवीन खुलाशामुळे प्रिन्स अँड्र्यू यांच्यासह संपूर्ण राजघराण्याची प्रतिमा पुन्हा एकदा मलीन झाली असून जगभरात याची चर्चा सुरू झाली आहे. या पीडितेचे प्रतिनिधित्व करणारे अमेरिकन वकील ब्रॅड एडवर्ड्स यांनी बीबीसीला दिलेल्या माहितीनुसार, ही घटना २०१० मधील असून त्यावेळी पीडितेचे वय अवघे २० वर्षे होते. तिला लंडनच्या पश्चिमेला असलेल्या विंडसर इस्टेट या शाही निवासस्थानी नेण्यात आले होते. तिथे तिने प्रिन्स अँड्र्यू यांच्यासोबत रात्र घालवली होती. धक्कादायक बाब म्हणजे, या भेटीनंतर तिला बकिंगहॅम पॅलेसची सफरही घडवून आणण्यात आली होती. वकील एडवर्ड्स यांनी स्पष्ट केले की, ही एक नियोजित घटना होती आणि आता ही पीडिता माजी प्रिन्सविरुद्ध दिवाणी खटला दाखल करण्याच्या तयारीत आहे. दरम्यान, अमेरिकन न्याय विभागाने एपस्टीन प्रकरणाशी संबंधित कागदपत्रांचा नवीन साठा सार्वजनिक केल्यामुळे हे प्रकरण अधिक चिघळले आहे. या कागदपत्रांमध्ये काही आक्षेपार्ह छायाचित्रांचा समावेश असून, एका फोटोमध्ये प्रिन्स अँड्र्यू जमिनीवर झोपलेल्या एका महिलेवर गुडघे टेकून बसल्याचे दिसत आहेत. याशिवाय २०१० मधील काही ईमेल्सही समोर आले आहेत, ज्यात एका २६ वर्षीय रशियन महिलेसोबत अँड्र्यू यांना डिनरचा प्रस्ताव देण्यात आला होता. या पुराव्यांमुळे प्रिन्स अँड्र्यू यांच्या अडचणीत मोठी भर पडली आहे. या प्रकरणाचे पडसाद आता ब्रिटनच्या संसदेतही उमटले आहेत. ब्रिटनचे पंतप्रधान कीर स्टारमर यांनी यावर अत्यंत कडक भूमिका घेतली असून, त्यांनी प्रिन्स अँड्र्यू यांनी अमेरिकन काँग्रेससमोर हजर राहून एपस्टीनच्या गुन्ह्यांबद्दल साक्ष द्यावी, असे म्हटले आहे. राजघराण्यातील सदस्याने अमेरिकन अधिकाऱ्यांच्या चौकशीला सहकार्य करावे, असे पंतप्रधान स्टारमर यांनी स्पष्ट केल्यामुळे राजघराण्यावर राजकीय दबाव वाढला आहे. यापूर्वी व्हर्जिनिया गिउफ्रे या महिलेनेही प्रिन्स अँड्र्यू यांच्यावर १७ व्या वर्षी लैंगिक शोषणाचे आरोप केले होते. तो वाद मिटवण्यासाठी अँड्र्यू यांनी २०२२ मध्ये कोट्यवधी पाउंडची तडजोड केली होती. वारंवार होणाऱ्या या वादांमुळे किंग चार्ल्स तिसरे यांनी यापूर्वीच आपल्या भावाकडून सर्व लष्करी पदव्या आणि शाही सन्मान काढून घेतले होते. आता या नवीन आरोपांमुळे प्रिन्स अँड्र्यू यांना त्यांच्या ‘रॉयल लॉज’ या निवासस्थानातूनही बेदखल करण्याची मागणी जोर धरू लागली आहे. या प्रकरणातील पुढील न्यायालयीन प्रक्रियेकडे आता संपूर्ण जगाचे लक्ष लागले आहे.
