PM Modi in Mumbai |  पंतप्रधान नरेंद्र मोदी आज मुंबईत दौऱ्यावर आहेत. आज ते तीन लढाऊ युद्धनौकांचे राष्ट्रार्पण करणार आहेत. याशिवाय महायुतीच्या आमदारांची भेटही घेणार आहेत. मंत्री, आमदारांना उपस्थित राहण्याबाबत तसे आदेश देण्यात आले आहेत.

दोन तासांची ही भेट असणार असून यावेळी मोदी हे महायुतीचे सर्व मंत्री व आमदारांचा क्लास घेणार असल्याचे म्हंटले जात आहे. ५ डिसेंबरला महायुती सरकारच्या शपथविधीसाठी पंतप्रधान नरेंद्र मोदी यांनी मुंबईत हजेरी लावली होती. त्यानंतर ते आता दुसऱ्यांदा मुंबईत येत आहेत.

कसा असणार पंतप्रधान मोदींचा दौरा?  PM Modi in Mumbai | 

मुंबईच्या नौदल गोदीत पंतप्रधानांच्या हस्ते सकाळी 10.30 च्या सुमारास आयएनएस सुरत, आयएनएस निलगिरी आणि आयएनएस वाघशीर या तीन युद्धनौकांचे राष्ट्रर्पण होईल. नौदलाचा कार्यक्रम आटोपल्यावर आमदारांशी नौदलाच्या आंग्रे सभागृहात संवाद साधतील.

या बैठकीसाठी आमदारांना सभागृहात मोबाईल नेण्यास मनाई करण्यात आली आहे. तसेच आमदारांना विधानभवन परिसरात एकत्र जमण्यास सांगण्यात आले आहे. तेथून बसमधून आमदारांना बैठकीच्या स्थळी नेण्यात येईल. येथे महायुतीचे मंत्री आणि आमदारांना ते मार्गदर्शन करतील.

मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांच्या उपस्थितीत मोदी मंत्र्यांसह आमदारांना काय कानमंत्र देतात याबाबत उत्सुकता आहे. त्यानंतर दुपारी 3:30 वाजण्याच्या सुमारास पंतप्रधानांच्या हस्ते नवी मुंबईतील खारघर येथील इस्कॉन मंदिराचे उद्घाटन होणार आहे.

तीन युद्धनौकांची खासियत  PM Modi in Mumbai | 

पंतप्रधान मोदी यांच्या हस्ते आज दोन युद्धनौका, एका पाणबुडीचे राष्ट्रार्पण होणार आहे. ‘आयएनएस सूरत’ ही सर्वांत मोठी आणि अत्याधुनिक विनाशिका आहे. ही क्षेपणास्त्रवाहू (पी१५बी गाईडेड मिसाईल) प्रकल्पातील चौथी आणि शेवटची विनाशिका आहे. यामध्ये ७५ टक्के तंत्रज्ञान स्वदेशी आहे. तर ‘आयएनएस निलगिरी’ ही (पी१७ए स्टेल्थ फ्रिगेट) या अत्याधुनिक तंत्रज्ञान प्रकल्पातील पहिली युद्धनौका आहे. ‘आयएनएस वाघशीर’ ही (पी७५ स्कॉर्पियन) प्रकल्पातील सहावी पाणबुडी असून फ्रान्सच्या सहकार्यातून ती बनविण्यात आली आहे.

मंदिरासाठी 200 कोटी रुपये खर्च PM Modi in Mumbai | 

त्यानंतर आशियातील दुसऱ्या क्रमांकाच्या इस्कॉन मंदिराचे आज मोदींच्या हस्ते उद्घाटन होणार आहेत. नवी मुंबईतील खारघर येथे नऊ एकर जागेवर ‘श्री श्री राधा मदन मोहन’ यांचे हे भव्य संगमरवरी मंदिर बांधण्यात आले आहे. हे मंदिर 200 कोटी रुपये खर्च करून बांधण्यात आले आहे. 12 वर्षांपासून या मंदिराचे काम सुरु होते.

हेही वाचा : 

मोठा खुलासा ! ‘या’ देशात १५० आयएसआय एजंटची हेरगिरी ; भारतात आहेत का एजंट? वाचा