तेहरान : इराणचे वरिष्ठ लष्करी कमांडर कासेम सोलेमानी यांच्या अंत्यसंस्काराच्यावेळी उपस्थित राहिलेल्या लाखो नागरिकांमध्ये मंगळवारी अभूतपूर्व चेंगराचेंगरी झाली. या चेंगराचेंगरीमध्ये तब्बल 32 जण ठार झाले. तर 190 जण जखमी झाले, अशी माहिती इराणच्या सरकारी वृत्तवाहिनीने दिली आहे.

रिव्होल्युशनरी गार्डचे जनरल कासेम सोलेमानी यांचे मूळ गाव असलेल्या कर्मन येथे सोलेमानी यांची अंत्ययात्रा सुरू असताना ही चेंगराचेंगरी झाली. या घटनेच्या ऑनलाइन पोस्ट केलेल्या प्रारंभीच्या व्हिडिओंमध्ये लोक रस्त्यावर निर्जीव पडलेले दिसले. इतर नागरिक त्यांना मदत करण्याचा प्रयत्न करत असल्याचेही दिसले.

इराणचे आपत्कालीन वैद्यकीय सेवा प्रमुख पिरहोसीन कौलिव्हंद यांनी मृतांच्या संख्येबाबत दुजोरा दिला आहे. अंत्यसंस्काराच्या मिरवणुकीत दुर्दैवाने चेंगराचेंगरी झाल्यामुळे काही जण जखमी झाले आणि काहींचा मृत्यू झाला, असे ते म्हणाले.

या दुर्घटनेमुळे सोलेमानींचा दफनविधी काही काळ पुढे ढकलावे लागले. हा दफनविधी कधी होईल हे अधिकाऱ्यांनी सांगितले नसल्याचे “आयएसएनए’ वृत्तसंस्थेने सांगितले. सोमवारी इराणची राजधानी तेहरानमधील अंत्ययात्रेमध्ये दहा लाखांहून अधिक लोक सहभागी झाले होते.

सोलेमानीच्या मृत्यूने इराणमध्ये “अमेरिकेविरूद्ध सूड म्हणून’ पुकारला आहे आणि यामुळे मध्यपूर्वेतील तणाव तीव्रपणे वाढला आहे. अमेरिकन सरकारने इराणकडून जागतिक उर्जा पुरवठ्यासाठी मध्यपूर्वेतील सर्व जलमार्ग, महत्त्वपूर्ण मार्ग ओलांडून जाणाऱ्या जहाजांना अनिश्‍चित धोक्‍याचा इशारा दिला आहे.