Avinash Shilimkar – पुणे जिल्ह्याच्या पोलीस दलाने देशपातळीवर पुन्हा एकदा आपली छाप पाडली आहे. पुणे ग्रामीण गुन्हे शाखेत कार्यरत असलेले वरिष्ठ पोलीस निरीक्षक अविनाश शिळीमकर यांना त्यांच्या उल्लेखनीय, कर्तव्यनिष्ठ आणि प्रभावी सेवेसाठी राष्ट्रपती पदक जाहीर झाले आहे. प्रजासत्ताक दिनाच्या पूर्वसंध्येला केंद्रीय गृह मंत्रालयाकडून पोलीस पदकांची घोषणा करण्यात आली. भोर तालुक्यातील तांबड, गुंजन मावळ हे शिळीमकर यांचे मूळ गाव आहे. त्यांनी प्राथमिक शिक्षण जिल्हा परिषद शाळेत पूर्ण केले, तर पदवी शिक्षण पुण्यातील सर परशुरामभाऊ महाविद्यालयातून घेतले. सन १९९३ मध्ये त्यांनी पोलीस दलात उपनिरीक्षक म्हणून कारकिर्दीची सुरुवात केली. मुंबईतील येलो गेट, वडाळा आणि एल. टी. मार्ग पोलीस ठाण्यांतून त्यांनी सेवा बजावली. यानंतर मुंबई शहर, सातारा, नागपूर शहर गुन्हे शाखा, अहिल्यानगर विशेष शाखा आणि सध्या पुणे ग्रामीण गुन्हे शाखा अशा विविध ठिकाणी त्यांनी प्रभावी कामगिरी केली आहे. त्यांचा एकूण सेवाकाल तब्बल ३२ वर्षांचा आहे. सेवाकाळात त्यांनी अनेक कुख्यात गुन्हेगार टोळ्यांना जेरबंद करत महत्त्वपूर्ण यश मिळवले. पुणे ग्रामीणमध्ये कार्यरत असताना ऊरुळी कांचन परिसरातील कुख्यात आप्पा लोंढे टोळीवर कारवाई करून परिसरातील गुन्हेगारीवर आळा घातला. नागपूर शहरात कार्यरत असताना खून, दरोडा, खंडणीसह तब्बल ३८ गंभीर गुन्हे उघडकीस आणत कुख्यात राजा गौस टोळीचा पर्दाफाश केला. तसेच संतोष आंबेकर टोळीवर कारवाई करून नागपूर शहरातील दहशत संपुष्टात आणण्यात त्यांनी मोलाचा वाटा उचलला. अहिल्यानगर जिल्ह्यात शेतकऱ्यांच्या जनावरांच्या व शेतीमाल चोरीप्रकरणी स्वतः मैदानात उतरून सराईत टोळ्यांचा छडा लावत चोरीचा मुद्देमाल शेतकऱ्यांना परत मिळवून दिला. कोरोना महामारीच्या काळात पुणे ग्रामीण आणि अहिल्यानगर येथे कार्यरत असताना स्थलांतरित मजुरांसाठी विविध उपाययोजना राबविणे, तसेच पोलीस कर्मचाऱ्यांसाठी वैद्यकीय सुविधा उपलब्ध करून देण्यात त्यांनी पुढाकार घेतला. नोव्हेंबर २०२२ पासून पुणे ग्रामीण स्थानिक गुन्हे शाखेत वरिष्ठ पोलीस निरीक्षक म्हणून कार्यरत असताना दरोडा, जबरी चोरी, घरफोडी तसेच आंतरराज्यीय गुन्हेगार टोळ्यांवर मोठ्या प्रमाणावर कारवाई करण्यात आली. यवत येथील एका कुटुंबातील सात जणांच्या मृत्यूचा गुन्हा आत्महत्येऐवजी खून असल्याचे सिद्ध करणे, सासवड तहसील कार्यालयातील ईव्हीएम चोरीचा छडा लावणे, तसेच महामार्गावरील लुटमार करणाऱ्या टोळ्यांना जेरबंद करणे ही त्यांची ठळक कामगिरी आहे. अवैध अग्निशस्त्र व अमली पदार्थ जप्ती, मोक्का व एमपीडीए अंतर्गत कारवाई, दंगल नियंत्रण तसेच निवडणूक काळातील बंदोबस्त आदी सर्वच बाबींमध्ये त्यांनी प्रभावी नेतृत्व दाखवले आहे. त्यांच्या या उत्कृष्ट सेवेसाठी यापूर्वी २०२४ मध्ये त्यांना पोलीस महासंचालक पदकानेही गौरविण्यात आले होते. कर्तव्यनिष्ठा, प्रामाणिकपणा आणि शिस्तप्रिय स्वभावामुळे अविनाश शिळीमकर हे पोलीस दलातील आदर्श अधिकारी म्हणून ओळखले जातात. राष्ट्रपती पदकाच्या सन्मानामुळे पुणे जिल्ह्याला पुन्हा एकदा गौरव प्राप्त झाला आहे.