Suresh Dhas | मस्साजोग गावचे सरपंच संतोष देशमुख यांच्या हत्येप्रकरणानंतर राज्यभरातून संताप व्यक्त केला जात आहे. या प्रकरणात मुख्य आरोपी सुदर्शन घुले, सुधीर सांगळे, जयराम चाटे, विष्णू चाटे, प्रतिक घुले, महेश केदार यांना अटक करण्यात आली. त्यांच्यावर मकोकाही लावण्यात आला. या घटनेला एक महिना उलटून गेल्यानंतरही यातील एक आरोपी कृष्णा आंधळे अद्यापही फरार आहे. संतोष देशमुख हत्या प्रकरणात फरार असलेला कृष्णा आंधळे कोण याबाबत सुरेश धस यांनी माहिती दिली आहे. काय म्हणाले सुरेश धस? “कृष्णा आंधळे हा संभाजीनगरला पूर्वी पोलीस भरतीची तयारी करत होता. मात्र तयारी करत असतानाच तो गुन्हेगारीकडे वळला. यापूर्वी त्याने संभाजीनगरमध्ये काही गुन्हे केलले आहेत. त्याच्या घरी गरीबी आहे, पत्र्याचं घर आहे. त्याला घराबद्दल, आई वडिलांबद्दल ओढ नाही. तो अनेक दिवस संपर्कविना राहत असतो. त्यामुळे तो एक राज्य सोडून दुसऱ्या राज्यात किंवा नेपाळ वगैरे अशा ठिकाणी गेला आहे का? याचा तपास सुरु आहे. कृष्णा आंधळेला अटक झाली पाहिजे. ५० दिवस झाले आहेत अजूनही एक आरोपी फरार आहे. पण आम्ही तपासावर समाधानी आहोत,” अशी माहिती सुरेश धस यांनी दिली. “एसआयटी आणि आमच्या जिल्ह्यातील पोलीस चांगलं काम करत आहेत. काही पोरांची नावं पेपरमध्ये आली आहेत. माझी वरिष्ठांना किंवा माहिती देणाऱ्या विनंती आहे की चुकीची माहिती देऊ नये. भागवत, शेलार यांच्यासारख्या एलसीबीच्या ज्या पोरांनी जी कोणी लोक आहेत यांनी ६ पैकी ५ आरोपी यांनीच पकडले आहेत आणि आता त्यांचीच नाव टीव्हीवर ‘आका’शी संबंध असल्याचे दाखवलं जात आहेत.” असं सुरेश धस म्हणाले. धनंजय मुंडेंवर हल्लाबोल तर दुसरीकडे सुरेश धस यांनी मंत्री धनंजय मुंडे यांच्यावर देखील निशाणा साधला. बीड परळी मतदारसंघात 2021 ते 2024 या काळात तत्कालीन पालकमंत्री धनंजय मुंडे यांनी काही काम न करता बोगस बिल सादर करत तब्बल 73 कोटी 36 लाख रुपये उचलत भ्रष्टाचार केल्याचा खळबळजनक आरोप भाजप आमदार सुरेश धस यांनी केला आहे. बीड जिल्ह्याचे जिल्हा नियोजनचे बजेट 400 कोटींचे आहे. त्यातील 90 टक्के पैसे परळीला घेऊन जायचे आणि 10 टक्के जिल्ह्यातील इतर भागाला द्यायचे. लाखो मतांनी धनंजय मुंडे निवडून नाही यायचे तर काय होणार? असे म्हणत आमदार सुरेश धस यांनी मंत्री धनंजय मुंडे यांच्यावर हल्लाबोल केला. हेही वाचा: दक्षिण सुदानमध्ये विमान अपघात; केवळ एक जण बचावला, मृतांमध्ये भारतीय नागरिकाचा समावेश
