Preity Zinta : अभिनेता आणि दिग्दर्शक कुणाल खेमू आता एका आगळ्यावेगळ्या विषयावर आधारित ‘व्हाइब’ हा नवा चित्रपट घेऊन प्रेक्षकांच्या भेटीला येत आहे. या चित्रपटाचा ट्रेलर २ सप्टेंबर रोजी प्रदर्शित झाला. ट्रेलरमध्ये अभिनेत्री प्रीती झिंटा एका वेगळ्या आणि यापूर्वी कधीही न पाहिलेल्या अवतारात दिसत आहे.

तिच्या दमदार ॲक्शन अवताराची सोशल मीडियावर जोरदार चर्चा सुरू असून, या भूमिकेत तिला पाहण्यासाठी चाहते उत्सुक झाले आहेत. कॉमेडी आणि ॲक्शनचा तडका असलेल्या या चित्रपटात प्रीतीने ‘मॅडम एच’ ही धमाकेदार व्यक्तिरेखा साकारली आहे. ट्रेलर लाँचवेळी तिने या भूमिकेचा अनुभवही शेअर केला. ॲक्शन सीन्सच्या शूटिंगदरम्यान दुखापत झाल्याचे तिने सांगितले.

“मला हे कबूल करावंच लागेल की, ॲक्शन सीन्स खूप अवघड होते. मला नेहमी वाटायचं की अभिनेत्रींना गाण्यांसाठी आणि इतर सर्व गोष्टींसाठी जास्त मेहनत घ्यावी लागते. पण जेव्हा आम्ही ॲक्शन सीक्वेन्स शूट करत होतो, तेव्हा शूटिंगचे तास खरंच खूप जास्त होते. मला लाथा-बुक्के बसले आणि इथे-तिथे दुखापतही झाली. अर्थात, हे मुद्दाम केलेलं नव्हतं. त्यासाठी मला माझ्या ॲक्शन टीमचे आभार मानायचे आहेत.” असा अनुभव प्रीतीने अॅक्शन सीन शूट करतानाच सांगितला.

या चित्रपटात कुणाल खेमू मुख्य भूमिकेत असून, त्याच्यासोबत प्रीती झिंटा, स्पर्श श्रीवास्तव, वंशिका धीर आणि इतर कलाकार झळकणार आहेत. विशेष म्हणजे, कुणालची सासू आणि ज्येष्ठ अभिनेत्री शर्मिला टागोर यांचीही चित्रपटात विशेष भूमिका आहे. ट्रेलर प्रदर्शित झाल्यानंतर चित्रपटाची कथा, कलाकारांचा अभिनय आणि कॉमेडी-अॅक्शनच्या मिश्रणाचे प्रेक्षकांकडून कौतुक होत आहे. विशेषतः कुणाल खेमूच्या कॉमिक टायमिंगने चाहत्यांचे लक्ष वेधून घेतले आहे.

ट्रेलरमध्ये कुणालने साकारलेल्या हार्दिक आणि स्पर्श श्रीवास्तवच्या बग्ज या व्यक्तिरेखांची ओळख करून दिली जाते. दोघेही मित्र आपले सामान्य आयुष्य जगत असतात. मात्र, देशावर मोठे संकट ओढावल्याने त्यांना अचानक नायकाची भूमिका बजावण्याची वेळ येते. या मोहिमेसाठी ते दोघेही पूर्णपणे तयार नसतात आणि पुढे कोणत्या संकटांना सामोरे जावे लागणार आहे, याची त्यांना कल्पनाही नसते. अॅक्शन सीक्वेन्स, उत्साही संगीत आणि अनेक ट्विस्ट्समुळे ट्रेलर अधिक रंगतदार ठरतो. ‘व्हाइब’ हा कुणाल खेमूचा निर्माता म्हणून पहिला चित्रपटही आहे. कुणाल खेमू लिखित आणि दिग्दर्शित ‘व्हाइब’ हा चित्रपट १८ सप्टेंबर रोजी चित्रपटगृहांमध्ये प्रदर्शित होणार आहे.

Supriya Sule: “फोटो हटवला तर गुन्हा दाखल झाला, पण अजित पवार अपघात प्रकरणात अद्याप गुन्हा दाखल नाही”- सुप्रिया सुळे