Pratibha Dhanorkar : दिल्लीतील काँग्रेस आणि इंडिया आघाडीच्या आंदोलनादरम्यान एका रॅलीसाठी काँग्रेसचे खासदार बसमधून एकत्र प्रवास करत होते. त्यादरम्यानचा एक व्हिडीओ समोर आला आहे. ज्यात खासदार श्यामकुमार बर्वे यांनी चंद्रपूरच्या खासदार प्रतिभा धानोरकर यांच्या गालावर चापट मारल्याचा दावा केला जात आहे.

या व्हिडिओमुळे राजकीय वर्तुळात चर्चेला उधाण आले असून, काँग्रेसमधील काही पदाधिकाऱ्यांनी या प्रकरणाची थेट पक्षश्रेष्ठींकडे तक्रार केली. काँग्रेसच्या 1 नोव्हेंबर रोजी झालेल्या ‘व्होट बचाव देश बचाव रॅली’च्या दिवशी काही काँग्रेस खासदारांचा वर्तन पक्षाच्या प्रतिमेला धक्का पोहोचवणारा असल्याची तक्रार काँग्रेसच्या काही पदाधिकाऱ्यांनी वरिष्ठांना केली आहे.

या सगळ्या प्रकारानंतर स्वत: प्रतिभा धानोरकर यांनी खुलासा केला असून, बर्वे यांनी माझ्यासोबत कोणतेही चुकीचे कृत्य केले नाही. त्यांनी खरंच मला चापट मारली असती तर मी स्वत: काँग्रेस नेतृत्वाकडे याबाबतची तक्रार केली असती, असे सांगितले.

प्रतिभा धानोरकर काय म्हणाल्या? 

या प्रकरणावर स्पष्टीकरण देताना चंद्रपूरच्या खासदार प्रतिभा धानोरकर यांनी म्हटलं आहे की, “आम्ही सगळे खासदार भावा-बहिणीसारखे राहतो. बातमी करण्यासारखा हा विषय नव्हता. श्यामकुमार बर्वे हे मला मोठ्या भावासारखे आहेत. अशा पद्धतीने एखाद्या महिला खासदाराची बदनामी करणे योग्य नाही. काँग्रेसच्या वरिष्ठांकडे याबाबतची तक्रार करणारे आमचे हितचिंतक किंवा राजकीय विरोधक असू शकतात,” असा संशयही धानोरकर यांनी व्यक्त केला आहे.

दिल्लीत नेमकं काय घडलं?

दिल्लीमध्ये १ नोव्हेंबर रोजी आयोजित रॅलीमध्ये सहभागी होण्यासाठी काँग्रेसचे खासदार बसमधून एकत्र जात होते. याच प्रवासादरम्यानचा हा व्हिडिओ असल्याचा दावा केला जात आहे. व्हायरल झालेल्या व्हिडिओमध्ये रामटेकचे खासदार श्यामकुमार बर्वे हे उभे असल्याचे दिसते.

त्यांच्या शेजारी चंद्रपूरच्या खासदार प्रतिभा धानोरकर आणि मुंबई काँग्रेसच्या नेत्या वर्षा गायकवाड बसलेल्या दिसतात. तिघांमध्ये काहीतरी संभाषण सुरू असताना श्यामकुमार बर्वे हे प्रतिभा धानोरकर यांच्या गालावर हाताने हलकी चापट मारताना दिसत आहे.

ई-मेलद्वारे तक्रार

दरम्यान, हा व्हिडिओ व्हायरल झाल्यानंतर काँग्रेसमधील एका गटातून नाराजी व्यक्त केली जात आहे. एका महिला खासदारासोबत सार्वजनिक ठिकाणी अशा प्रकारचे वर्तन झाल्याचा आरोप करत काही काँग्रेस पदाधिकाऱ्यांनी काँग्रेसचे राष्ट्रीय अध्यक्ष मल्लिकार्जुन खरगे, लोकसभेतील विरोधी पक्षनेते राहुल गांधी आणि ज्येष्ठ नेत्या सोनिया गांधी यांच्याकडे ई-मेलद्वारे तक्रार केल्याची माहिती आहे.

खासदार श्यामकुमार बर्वे यांच्या या कथित वर्तनाची चौकशी करून तसेच या प्रकरणाची गांभीर्याने दखल घेऊन संबंधित खासदाराला जाब विचारावा आणि योग्य ती शिस्तभंगाची कारवाई करावी, अशी मागणी ई-मेलमधून करण्यात आली आहे.

हेही वाचा: 

Akhilesh Yadav on Dhirendra Shastri: ‘ब्रज-अवधमध्ये प्रवेश नकोच!’ ;धीरेंद्र शास्त्रींवर बंदी घालण्याची अखिलेश यादवांची मागणी