Pratap Sarnaik : गुजरातच्या धर्तीवर राज्यात आधुनिक ‘बसपोर्ट’ उभारण्याचा निर्णय राज्य शासनाने घेतला आहे. एसटी महामंडळाच्या डेपो आणि बसस्थानकांचा सर्वांगीण विकास करण्यासाठी नवीन धोरण आखण्यात आले असल्याचे परिवहन मंत्री प्रताप सरनाईक (Pratap Sarnaik) यांनी विधान परिषदेत सांगितले. याविषयी प्रवीण दरेकर यांनी सभागृहात केलेल्या चर्चेला उत्तर देताना प्रताप सरनाईक म्हणाले, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार यांच्या मार्गदर्शनाखाली राज्यात आधुनिक आणि प्रवासी सुविधांनी सुसज्ज एसटी बसस्थानके उभारण्यात येणार आहेत. राज्यातील एसटी बस स्थानक व डेपोंच्या व्यावसायिक तत्वावरील विकास प्रकल्पांसाठी प्रत्यक्ष भाडेकरार ४९+४९ वर्षे म्हणजे ९८ वर्षे असा ठेवण्याची तरतूद करण्यात आली आहे. त्यामुळे गुंतवणूकदारांना प्रकल्प राबविण्यास प्रोत्साहन मिळेल आणि एसटी महामंडळालाही दीर्घकालीन आर्थिक उत्पन्न मिळेल. प्रवाशांनाही स्वच्छ, सुरक्षित व आधुनिक सुविधा उपलब्ध होतील. तसेच या प्रकल्पांमधून स्थानिक युवकांसाठी मोठ्या प्रमाणात रोजगार व व्यवसायाच्या संधी निर्माण होतील, असेही ते म्हणाले. या प्रकल्पांतर्गत केवळ शहरी भागांवर भर न देता संतुलित विकासावरही लक्ष देण्यात येणार आहे. त्यासाठी शहरी भागातील एक डेपो, तालुकास्तरावरील एक डेपो आणि ग्रामीण भागातील एक डेपो अशा तीन डेपोचे पॅकेज तयार करून निविदा प्रक्रिया राबविण्यात येणार आहे. यामुळे ग्रामीण भागातील बसस्थानकांचाही विकास होणार असल्याचेही त्यांनी सांगितले.
